सुरुङबाट उद्धार गरिएका दुई जना अस्पतालबाट डिस्चार्ज

काठमाडौं । त्रिशूली–३ ए र माथिल्लो त्रिशूल–१ जलविद्युत आयोजनाको सुरुङबाट उद्धार गरिएका दुई जना डिस्चार्ज भएका छन् । सञ्जय शाह र चिनियाँ नागरिक लुआइतोलाई उपचारपछि शुक्रबार अस्पतालबाट डिस्चार्ज गरिएको सैनिक प्रवक्ता (सहायकरथी) राजाराम बस्नेतले बताए ।

१० औँ दिनमा उद्धार गरिएका शाह र ११ औँ दिनमा उद्धार गरिएका चिनियाँको छाउनी स्थित सैनिक अस्पतालमा उपचार भइरहेको थियो । सुरक्षाकर्मीहरूले माथिल्लो त्रिशूली–१ जलविद्युत आयोजनाको सुरुङको २२५ मिटर भित्र सुरुङबाट चिनियाँ नागरिक लुआइतोलाई उद्धार गरेका थिए । उद्धारपछि उनीहरूलाई हेलिकप्टरमार्फत काठमाडौँ ल्याएर अस्पताल भर्ना गरिएको थियो । एक साताको उपचारपछि उनीहरू स्वास्थ्यलाभ गरेर घर फर्किएका हुन् । सुरुङबाट उनीहरूलाई सेना, सशस्त्र प्रहरी बल र विदेशी सुरुङ विज्ञहरूको टोलीले सकुशल उद्धार गरेका थिए । सञ्जय साह विद्युत् प्राधिकरणको मेकानिकल समूहका फोरम्यान हुन् ।

सञ्जयसँगै त्रिशूली–३ ए जलविद्युत आयोजनाका सुपरभाइजर कविर महर्जनको पनि सकुशल उद्धार गरिएको थियो । भोटेकोशीको बाढीका कारण फसेकाहरूको खोजी तथा उद्धारका लागी अहिले ७ वटा सुरुङमा काम भइरहेको सहायकरथी बस्नेतले बताए ।