काठमाडौं । नेपालभर सक्रिय मौसम प्रणाली पूर्वतिर सर्दै जाँदा देशका विभिन्न भू–भागमा हुरीबतास, मेघगर्जन र चट्याङसहित वर्षा भइरहेको छ। सुदूरपश्चिमबाट सुरु भएको यो प्रणाली लुम्बिनी हुँदै बागमती र मधेश प्रदेशसम्म फैलिएको छ, जसका कारण काठमाडौँ उपत्यकासहित धेरै स्थानमा पानी पर्न थालेको छ।
जल तथा मौसम विज्ञान विभागका अनुसार हाल पश्चिमी वायु, स्थानीय वायु तथा पूर्वी भू–भाग नजिकको न्यून चापीय क्षेत्रको संयुक्त प्रभावले मौसम प्रभावित बनेको हो। साथै दक्षिणी भू–भाग हुँदै फैलिएको न्यून चापीय रेखाले वर्षालाई थप सक्रिय बनाएको छ।
मौसमविद्का अनुसार अहिले कर्णाली र लुम्बिनी प्रदेशका विभिन्न जिल्लामा हुरीबतास र चट्याङसहित मध्यम वर्षा भइरहेको छ भने सुदूरपश्चिममा पूर्ण बदली रही केही ठाउँमा मेघगर्जनसहित वर्षा जारी छ। बागमती र मधेश प्रदेशका अधिकांश क्षेत्रमा पनि वर्षा विस्तार हुँदै गएको छ।
हुरीबतासको गति करिब ४० किलोमिटर प्रतिघण्टासम्म पुग्न सक्ने अनुमान गरिएको छ र यसको प्रभाव केही स्थानमा झन्डै दुई घण्टासम्म रहन सक्छ। आज विशेषगरी भारी वर्षाको सम्भावना रहेको र बेलुकीपछि केही सुधार आउने अपेक्षा गरिएको छ।
यद्यपि, विभागले यो मौसम प्रणाली अझै केही दिन सक्रिय रहने जनाउँदै हप्ताभर नै देशका विभिन्न स्थानमा वर्षा हुने संकेत गरेको छ। त्यसैले आवश्यक सतर्कता अपनाउन सबैलाई अनुरोध गरिएको छ।
क्याटेगोरी : समाचार
प्रतिक्रिया