डाटा हबमा ‘साइबर अट्याक’: सोमबार सेयर कारोबार ठप्प

काठमाडौं। नेपाल स्टक एक्सचेन्ज (नेप्से) को डाटा हबमा साइबर आक्रमण भएपछि सोमबारको सेयर कारोबार प्रभावित हुने भएको छ। डाटा हबमा ह्याकरले आक्रमण गरेपछि नेप्सेले आजको कारोबार रोक्ने तयारी गरेको छ।

नेप्सेका प्रमुख कार्यकारी अधिकृत (सीईओ) चुणामणि चापागाईंका अनुसार आइतबारदेखि देखिएको साइबर समस्याका कारण ७२ वटा ब्रोकर कम्पनीहरूको ‘ट्रेड म्यानेजमेन्ट सिस्टम’ (टीएमएस) सञ्चालन गर्न नसकिने अवस्था सिर्जना भएको छ।

आफ्नै टीएमएस रहेका १२ वटा ब्रोकर कम्पनीहरूको प्रणाली भने सञ्चालनमा रहे पनि अधिकांश ब्रोकरको सेवा अवरुद्ध भएकाले अपरिहार्य परिस्थितिका कारण कारोबार स्थगित गर्नुपरेको हो।

उक्त डाटा हबमा नेप्सेसहित करिब १७ देखि १८ वटा अन्य सरकारी निकायका महत्त्वपूर्ण तथ्याङ्क तथा रेकर्डहरूसमेत रहेको बताइएको छ। प्रणालीलाई सुरक्षित बनाउन र समस्या समाधानका लागि प्राविधिक टोलीले काम गरिरहेको छ।