रसुवाको बाढीपछि त्रिशूलीस्थित कृषि विकास बैंकको सेवा नुवाकोटबाट सञ्चालन

नुवाकोट । रसुवामा आएको विनाशकारी बाढीका कारण त्रिशूलीस्थित कृषि विकास बैंक लिमिटेडको शाखा कार्यालयमा क्षति पुगेपछि बैंकले आफ्ना ग्राहकलाई बैंकिङ सेवा सहज रूपमा उपलब्ध गराउन नुवाकोटको बट्टारबाट अस्थायी रूपमा सम्पूर्ण बैंकिङ कारोबार सञ्चालनमा ल्याएको छ।

केही समयअघि रसुवा, नुवाकोट तथा धादिङ क्षेत्रमा आएको बाढी तथा लेदोसहितको भेलले त्रिशूली शाखाको भौतिक संरचना, बैंकिङ उपकरण तथा सञ्चार प्रणालीमा उल्लेख्य क्षति पुर्‍याएको थियो। बाढीबाट शाखाको पूर्वाधारमा क्षति भएपछि नियमित स्थानबाट बैंकिङ सेवा सञ्चालन गर्न कठिनाइ उत्पन्न भएको थियो।

ग्राहकको सुविधालाई प्राथमिकतामा राख्दै बैंकले बट्टारमा अस्थायी कार्यालय स्थापना गरी नियमित बैंकिङ सेवा प्रदान गर्दै आएको जनाएको छ। हाल उक्त कार्यालयबाट निक्षेप संकलन, नगद भुक्तानी, रेमिट्यान्सलगायत आवश्यक बैंकिङ सेवाहरू निरन्तर उपलब्ध भइरहेका छन्।

बैंक व्यवस्थापनका अनुसार त्रिशूली शाखाका लागि उपयुक्त स्थान छनोट तथा आवश्यक तयारीको काम तीव्र गतिमा अघि बढाइएको छ। छिट्टै नयाँ तथा उपयुक्त स्थानबाट शाखाको सेवा स्थायी रूपमा सञ्चालनमा ल्याउने तयारी भइरहेको बैंकले जनाएको छ।

शाखा कार्यालय स्थानान्तरणका कारण ग्राहक तथा सरोकारवालालाई पर्न गएको असुविधाप्रति बैंकले संवेदनशीलता व्यक्त गर्दै विषम परिस्थितिमा ग्राहकबाट प्राप्त निरन्तर सहयोग र विश्वासप्रति आभार व्यक्त गरेको छ।