सुनको मूल्य तोलामा २ हजार ३०० रुपैयाँले घट्यो, चाँदी पनि सस्तियो

काठमाडौं। नेपाली बजारमा बिहीबार सुनचाँदीको मूल्यमा ठूलो गिरावट आएको छ। बुधबारको तुलनामा बिहीबार (असोज १) छापावाल सुनको मूल्य तोलामा २ हजार ३०० रुपैयाँले घटेको नेपाल सुनचाँदी व्यवसायी महासंघले जनाएको छ।

मूल्य घटेसँगै बिहीबार छापावाल सुनको कारोबार मूल्य प्रतितोला २ लाख ९९ हजार ५०० रुपैयाँ कायम भएको छ।

चालु साता नेपाली बजारमा सुनको मूल्यमा निरन्तर उतारचढाव आइरहेको छ।

साताको पहिलो दिन आइतबार १ हजार २०० रुपैयाँले बढेर ३ लाख २ हजार २०० रुपैयाँ पुगेको सुनको मूल्य सोमबार १ हजार २०० रुपैयाँ र मंगलबार ९०० रुपैयाँले घटेर ३ लाख १०० रुपैयाँमा झरेको थियो। बुधबार पुनः १ हजार ७०० रुपैयाँले उकालो लाग्दै ३ लाख १ हजार ८०० रुपैयाँ पुगेको सुनको मूल्य बिहीबार भने फेरि ओरालो लागेको हो।

यसैगरी, बिहीबार चाँदीको मूल्य पनि तोलामा ६० रुपैयाँले घटेर ४ हजार ६२५ रुपैयाँ कायम भएको छ। यसअघि बुधबार चाँदीको मूल्य ८५ रुपैयाँले बढेर ४ हजार ६८५ रुपैयाँ पुगेको थियो।

साताको सुरुवातमा आइतबार ६० रुपैयाँले बढेर ४ हजार ६६० रुपैयाँ पुगेको चाँदी सोमबार ४० रुपैयाँ र मंगलबार २० रुपैयाँले घटेको थियो।