जलनका बिरामीको उपचारका लागि कीर्तिपुर अस्पताललाई २ करोड

काठमाडौं महानगरपालिकाले जलनका बिरामीको उपचार तथा आवश्यक उपकरण व्यवस्थापनका लागि कीर्तिपुर अस्पताललाई २ करोड रुपैयाँ उपलब्ध गराएको छ। 

महानगरपालिकाले कीर्तिपुर अस्पताल (जनस्वास्थ्य सरोकार ट्रस्ट) सँग सम्झौता गर्दै लक्षित वर्गका जलनका बिरामीलाई प्रतिव्यक्ति २ लाख रुपैयाँसम्म निःशुल्क उपचार उपलब्ध गराउने व्यवस्था गरेको हो। 

महानगरपालिकाकी कार्यवाहक प्रमुख सुनिता डंगोल र प्रमुख प्रशासकीय अधिकृत मुक्तिराम अर्यालको रोहवरमा महानगरपालिकाका स्वास्थ्य विभाग प्रमुख दीपककुमार केसी तथा अस्पतालका कार्यकारी निर्देशक गौरी प्रधानले सम्झौतापत्रमा हस्ताक्षर गरेका छन्। 

महानगरपालिकाका अनुसार उपलब्ध गराइएको २ करोड रुपैयाँमध्ये १ करोड रुपैयाँ ‘जलन उपचार कोष’मा राखिनेछ। उक्त कोषबाट लक्षित वर्गका जलनका बिरामीको उपचार खर्च व्यहोर्ने व्यवस्था गरिएको छ। चालु आर्थिक वर्षमा कोषको रकम पूर्ण रूपमा खर्च हुन नसके बाँकी रकम आगामी वर्षमा समेत जलनका बिरामीको उपचारमा प्रयोग गरिनेछ। 

बाँकी १ करोड रुपैयाँबाट अस्पतालमा जलनका बिरामीको उपचारका लागि आवश्यक उपकरण खरिद गरिएको छ। उक्त रकमबाट एनेस्थेसिया मेसिन, २५० केभीएको जेनेरेटर र ५०० एमए क्षमताको डिजिटल एक्स–रे मेसिन खरिद गरिएको महानगरपालिकाले जनाएको छ। कार्यवाहक प्रमुख डंगोलले खरिद गरिएका उपकरण अस्पताललाई हस्तान्तरण गरेकी छन्।

अस्पतालका अनुसार महानगरपालिकाको सहयोगमा प्राप्त ५०० एमएको डिजिटल एक्स–रे मेसिनबाट दैनिक एक सय जनासम्मलाई सेवा दिन सकिनेछ। नयाँ उपकरणबाट जलनलगायत उपचारका लागि अस्पताल आउने बिरामीलाई थप सहज र प्रभावकारी सेवा उपलब्ध गराउन सहयोग पुग्ने अपेक्षा गरिएको छ। 

महानगरपालिकाले लक्षित वर्गका जलनका बिरामीलाई उपचारमा आर्थिक अभाव हुन नदिने उद्देश्यले अस्पतालसँग सहकार्य गरी उपचार कोष स्थापना गरेको जनाएको छ।