फ्लाई दुबईका सह–पाइलट यूएईलाई हस्तान्तरण

काठमाडौं । साउदी अरेबियाले फ्लाई दुबईको उडान एफजेड १०७३ का ओमानी सह–पाइलटलाई संयुक्त अरब इमिरेट्स (यूएई)का अधिकारीको जिम्मा लगाएको छ ।

उडानका क्रममा ककपिटभित्र क्याप्टेनमाथि आक्रमण गरेको र विमानलाई दुर्घटना गराउने प्रयास गरेको आरोप उनीमाथि छ ।

दुबईबाट तेल अभिवतर्फ जाँदै गरेको उक्त विमानलाई बुधबार ककपिटमा भएको घटनापछि साउदी अरेबियाको ताबुकमा आपत्कालीन अवतरण गराइएको थियो । साउदी गृह मन्त्रालयको प्रारम्भिक अनुसन्धानमा सह–पाइलटले क्याप्टेनमाथि प्रहार गरेको खुलेको छ ।

घटनामा दुवै पाइलट घाइते भएका थिए र उनीहरूको अस्पतालमा उपचार गरिएको थियो । मेडिकल परीक्षणपछि यात्राका लागि योग्य ठहरिएपछि उनीहरू बिहीबार बिहान अबुधाबीतर्फ प्रस्थान गरेका थिए ।

सह–पाइलटलाई भने साउदी अधिकारीहरूले नियन्त्रणमा लिएर सोधपुछ गरेपछि यूएईका अधिकारीलाई हस्तान्तरण गरेका हुन् ।

साउदी र यूएईद्वारा छुट्टाछुट्टै अनुसन्धान

साउदी गृह मन्त्रालयका अनुसार प्रारम्भिक अनुसन्धानमा सह–पाइलटले उडानकै क्रममा क्याप्टेनमाथि आक्रमण गरेको पुष्टि भएको छ । प्रारम्भिक छानबिन यूएईको सुरक्षा टोलीसँगको समन्वयमा गरिएको मन्त्रालयले जनाएको छ ।

यूएईले पनि घटनाबारे अनुसन्धान अघि बढाएको छ । त्यहाँका न्यायिक निकायले ककपिटभित्रको घटनाक्रम र विमानलाई आपत्कालीन अवतरण गराउनुपर्ने अवस्थाका कारणबारे विस्तृत अनुसन्धान गर्नेछन् । यूएईको परराष्ट्र मन्त्रालयले घटनालाई नजिकबाट नियालिरहेको र न्यायिक अधिकारीले अनुसन्धान गरिरहेको जनाएको छ ।

यूएईका लागि भारतीय राजदूत दीपक मित्तलले अस्पताल पुगेर क्याप्टेन मछार र उनका परिवारसँग भेट गरेका छन् । भारतीय दूतावासका अनुसार मछारको स्वास्थ्य अवस्था सामान्य छ र उनी उपचारपछि सुधारोन्मुख छन् ।

हाल अनुसन्धान एजेन्सीहरूले ककपिटभित्र वास्तवमा के–कस्ता घटनाक्रम भएका थिए, सह–पाइलटको उद्देश्य के थियो र त्यसका कारण विमानलाई आपत्कालीन अवतरण गर्नुपर्ने अवस्था कसरी सिर्जना भयो भन्नेबारे अनुसन्धान गरिरहेका छन् ।