काठमाडौं। प्रतिनिधिसभाको आज बस्ने बैठकमा वित्तीय, श्रम, सुरक्षा तथा सांस्कृतिक क्षेत्रसँग सम्बन्धित विभिन्न विधेयक र अन्तर्राष्ट्रिय महासन्धिका प्रस्तावमाथि प्रक्रिया अघि बढाइने भएको छ। संसद् सचिवालयले सार्वजनिक गरेको कार्यसूचीअनुसार बैठक बिहान ११ बजे सुरु हुनेछ।
बैठकमा अर्थमन्त्री स्वर्णिम वाग्लेले नेपाल राष्ट्र बैंक (तेस्रो संशोधन) विधेयक, २०८३ लाई दफावार अध्ययनका लागि सम्बन्धित समितिमा पठाउने प्रस्ताव प्रस्तुत गर्नेछन्। उक्त विधेयकले केन्द्रीय बैंकसँग सम्बन्धित कानुनी व्यवस्थामा संशोधन गर्ने उद्देश्य राखेको छ।यसैगरी, प्रधानमन्त्री बालेन्द्र शाहको तर्फबाट कानुन, न्याय तथा संसदीय मामिला मन्त्री सोबिता गौतमले नेपाल विशेष सेवा ऐन, २०८२ को साविकको व्यवस्था जगाउनेसम्बन्धी विधेयक, २०८३ संसद्मा दर्ता गर्न अनुमति माग्नेछिन्। अनुमति प्राप्त भएपछि सो विधेयक औपचारिक रूपमा प्रतिनिधिसभामा पेश गरिने कार्यसूची छ।
श्रम, रोजगार तथा सामाजिक सुरक्षा मन्त्री रामजी यादवले अन्तर्राष्ट्रिय श्रम संगठन (आईएलओ) को बाध्यकारी श्रम महासन्धि, १९३० सम्बन्धी सन् २०१४ को प्रोटोकल नम्बर–२९ माथि संसद्ले विचार गरोस् भन्ने प्रस्ताव पेश गर्नेछन्। श्रमिकको अधिकार संरक्षण र बाध्यकारी श्रम उन्मूलनका लागि यो प्रोटोकललाई महत्त्वपूर्ण मानिन्छ।
त्यस्तै, संस्कृति, पर्यटन तथा नागरिक उड्डयन मन्त्री खड्कराज पौडेलले राष्ट्रिय सभाबाट पारित भई प्रतिनिधिसभामा आएको अभौतिक सांस्कृतिक सम्पदा संरक्षण विधेयक, २०८३ लाई थप अध्ययनका लागि सम्बन्धित समितिमा पठाउने प्रस्ताव राख्नेछन्।
आजको बैठकमा आईएलओको श्रम निरीक्षण महासन्धि, १९४७ (महासन्धि नम्बर–८१) माथि पनि विचार गर्ने प्रस्ताव प्रस्तुत हुने संसद् सचिवालयले जनाएको छ। श्रम निरीक्षण प्रणालीलाई अन्तर्राष्ट्रिय अभ्यासअनुसार सुदृढ बनाउने उद्देश्यले उक्त महासन्धिसम्बन्धी प्रक्रिया अघि बढाउन लागिएको हो।प्रतिनिधिसभाको आजको बैठकमा प्रस्तुत हुने यी विधेयक र प्रस्तावहरूले आर्थिक प्रशासन, श्रम अधिकार, सांस्कृतिक सम्पदा संरक्षण तथा कानुनी व्यवस्थासँग सम्बन्धित महत्त्वपूर्ण विषयमा संसदीय प्रक्रिया अगाडि बढाउने अपेक्षा गरिएको छ।
क्याटेगोरी : समाचार
प्रतिक्रिया