काठमाडौं । सामाजिक सञ्जाल इन्स्टाग्रामले प्रयोगकर्ताले लामो समयदेखि अपेक्षा गरेको ‘ग्रिड रिअर्डरिङ’ फिचर सार्वजनिक गरेको छ। नयाँ फिचरसँगै प्रयोगकर्ताहरूले अब आफ्नो प्रोफाइलमा रहेका पोस्टहरूलाई इच्छाअनुसार पुनः व्यवस्थित गर्न सक्ने भएका छन्।
मेटाको स्वामित्वमा रहेको इन्स्टाग्रामले जुन ८ देखि यो सुविधा विस्तार गर्न थालेको जनाएको छ। यसअघि इन्स्टाग्रामका पोस्टहरू प्रोफाइलमा केवल प्रकाशित मितिअनुसार क्रमबद्ध रूपमा देखिने व्यवस्था थियो। नयाँ अपडेटपछि भने प्रयोगकर्ताले आफ्नो प्रोफाइलको दृश्यात्मक प्रस्तुति आफैंले निर्धारण गर्न सक्नेछन्।
कम्पनीका अनुसार यो फिचर विशेषगरी कन्टेन्ट क्रिएटर, व्यवसायिक ब्रान्ड तथा व्यक्तिगत प्रयोगकर्ताका लागि उपयोगी हुनेछ। यसले पुराना महत्त्वपूर्ण पोस्टहरूलाई पुनः अगाडि ल्याउन, नयाँ परियोजनालाई प्राथमिकताका साथ देखाउन तथा प्रोफाइललाई आकर्षक रूपमा प्रस्तुत गर्न सहयोग गर्ने विश्वास गरिएको छ।
इन्स्टाग्रामले जारी गरेको जानकारीअनुसार प्रयोगकर्ताले आफ्नो प्रोफाइलमा गएर कुनै पोस्टलाई केही समय थिचेर राख्नुपर्नेछ। त्यसपछि देखिने मेनुबाट ‘Reorder Grid’ विकल्प छनोट गरी पोस्टलाई आफूले चाहेको स्थानमा सार्न सकिनेछ।
यद्यपि, प्रोफाइलको शीर्ष भागमा ‘पिन’ गरेर राखिएका पोस्ट तथा रील्सहरू भने यथावत् रहनेछन् र ग्रिड रिअर्डरिङ प्रक्रियाले तिनको स्थान परिवर्तन गर्ने छैन।
सामाजिक सञ्जाल प्रयोगकर्ताको अनुभव थप व्यक्तिगत र सिर्जनात्मक बनाउने उद्देश्यका साथ इन्स्टाग्रामले यो फिचर ल्याएको जनाएको छ। डिजिटल सामग्रीको प्रस्तुति र ब्रान्डिङमा केन्द्रित प्रयोगकर्ताका लागि यो अपडेट महत्वपूर्ण मानिएको छ।
क्याटेगोरी : समाचार
प्रतिक्रिया