काठमाडौं । फिफा विश्वकप २०२६ को अन्तिम १६ मा युरोपका दुई बलिया टोली पोर्चुगल र स्पेनबीच बहुप्रतीक्षित भिडन्त हुने भएको छ। शुक्रबार बिहान सम्पन्न खेलमा पोर्चुगलले क्रोएसियालाई २–१ ले पराजित गर्दै अन्तिम १६ मा स्थान सुरक्षित गरेपछि छिमेकी राष्ट्र स्पेनसँगको भेट पक्का भएको हो।
खेलमा पोर्चुगल सुरुआतमै एक गोलले पछि परेको थियो। तर कप्तान क्रिस्टियानो रोनाल्डोले पेनाल्टीमार्फत बराबरी गोल फर्काए। त्यसपछि दोस्रो हाफको इन्जुरी समयमा मैदान प्रवेश गरेका गोन्कालो रामोसले निर्णायक गोल गर्दै पोर्चुगललाई रोमाञ्चक जित दिलाए।
यसअघि शुक्रबार बिहानै भएको अर्को खेलमा स्पेनले अस्ट्रियालाई ३–० ले सहज रूपमा पराजित गर्दै अन्तिम १६ मा आफ्नो स्थान सुनिश्चित गरेको थियो।
विश्वकप उपाधिका प्रमुख दाबेदार मानिएका यी दुई युरोपेली शक्तिबीच अब नकआउट चरणमै प्रतिस्पर्धा हुने भएकाले एक टोलीको यात्रा अन्तिम १६ बाटै टुंगिने निश्चित भएको छ।
रोनाल्डो र यमालबीच रोचक भिडन्त
यस विश्वकपअघि धेरै समर्थकले लियोनल मेसी र क्रिस्टियानो रोनाल्डोबीच सम्भावित ‘ड्रिम फाइनल’को चर्चा गरेका थिए। तर समूह चरणमा पोर्चुगल उपविजेता बनेपछि अर्जेन्टिना र पोर्चुगल फरक ब्राकेटमा परेका छन्। अब यी दुई टोली फाइनलसम्म पुगेमा मात्र मेसी–रोनाल्डो भिडन्त सम्भव हुनेछ।
तर त्यसअघि विश्व फुटबलका दुई फरक पुस्ताका प्रतिनिधिबीचको आकर्षक प्रतिस्पर्धा भने हेर्न पाइने भएको छ। ४१ वर्षीय अनुभवी सुपरस्टार क्रिस्टियानो रोनाल्डो र स्पेनका युवा सनसनी लामिन यमाल पहिलो पटक विश्वकपको नकआउट चरणमा आमनेसामने हुनेछन्।
रोनाल्डोले सन् २००६ मा विश्वकपमा डेब्यु गर्दा यमालको जन्मसमेत भएको थिएन। अहिले भने विश्वकपमा डेब्यु गरेका यमालले साउदी अरेबियाविरुद्ध आफ्नो पहिलो विश्वकप गोल समेत गरिसकेका छन्। अब उनी आफ्नै उमेरभन्दा दोब्बरभन्दा बढी अनुभव बोकेका रोनाल्डोविरुद्ध विश्वकपको सबैभन्दा प्रतीक्षित खेलमध्ये एकमा उत्रिनेछन्।
क्याटेगोरी : खेलकुद
प्रतिक्रिया