काठमाडौं । विश्वप्रसिद्ध पाककलाविद् तथा ‘बीबीसी मास्टरसेफ: द प्रोफेशनल्स’का विजेता सन्तोष साह पछिल्ला दिनमा चेक बाउन्ससम्बन्धी विवादका कारण चर्चामा छन्। विभिन्न सञ्चारमाध्यम र सामाजिक सञ्जालमा उनीविरुद्ध ‘चेक बाउन्स’ र ‘ठगी आरोप’ सम्बन्धी समाचार तथा टिप्पणीहरू सार्वजनिक भइरहेका बेला घटनाको अर्को पक्ष पनि बाहिर आएको छ।
साहले काठमाडौंको गैरीधारास्थित ‘मिथिला थाली’ रेस्टुरेन्ट सञ्चालनका लागि करिब दुई वर्षअघि सात वर्षको सम्झौतामा जग्गा भाडामा लिएका थिए। उक्त स्थानमा उनले करोडौं रुपैयाँ लगानी गरेको बताइन्छ। तर सम्झौताको अवधि बाँकी रहँदै जग्गाधनीले भाडा सम्झौता अन्त्य गर्न खोजेपछि विवाद सुरु भएको स्रोतहरूको दाबी छ।
जानकारहरूका अनुसार साह जग्गा खाली गर्न तयार भए पनि प्रक्रिया र आर्थिक हिसाब–किताब मिलाउने क्रममा विवाद चर्किएको हो। यही क्रममा २५ लाख रुपैयाँको चेकसम्बन्धी विषय अदालतसम्म पुगेपछि चेक साटिने प्रक्रिया प्रभावित भएको बताइन्छ।
साह निकट स्रोतहरूका अनुसार उनी आर्थिक रूपमा रकम तिर्न असमर्थ नभई कानुनी प्रक्रियाका कारण समस्या उत्पन्न भएको हो। “यो नियतको समस्या होइन, परिस्थितिले सिर्जना गरेको विवाद हो,” एक निकट स्रोतले भन्यो।
विश्व पाककला क्षेत्रमा नेपाललाई चिनाउने व्यक्तित्वका रूपमा चिनिएका साहले अन्तर्राष्ट्रिय मञ्चमा मैथिली र नेवारी परिकार प्रस्तुत गर्दै नेपालको पहिचान स्थापित गर्न महत्वपूर्ण योगदान दिएका छन्। सन् २०२५ को अन्त्यतिर नेशनल जियोग्राफिक म्यागजिनले ‘मिथिला थाली’लाई दक्षिण एसियाका उत्कृष्ट परिकारहरूमध्ये एकका रूपमा उल्लेख गरेको थियो।
अत्यन्तै सामान्य पारिवारिक पृष्ठभूमिबाट उठेर अन्तर्राष्ट्रिय सफलता हासिल गरेका साहले विदेशका प्रतिष्ठित होटलबाट आकर्षक अवसरहरू पाउँदा पनि नेपालमै लगानी गर्ने निर्णय गरेका थिए। उनको यही निर्णयबाट ‘मिथिला थाली’ परियोजना सुरु भएको हो।
यद्यपि पछिल्लो विवादले उनको छवि प्रभावित भएको देखिन्छ। सामाजिक सञ्जालमा घटनाको सम्पूर्ण पृष्ठभूमिभन्दा आरोपलाई बढी प्राथमिकता दिइएको भन्दै केहीले चिन्ता व्यक्त गरेका छन्। उनीहरूको तर्क छ—व्यावसायिक सम्झौता, कानुनी प्रक्रिया र सम्पत्ति विवादजस्ता विषयलाई अन्तिम निष्कर्ष नआउँदै व्यक्तिको चरित्रसँग जोडेर व्याख्या गर्नु उचित हुँदैन।
चेक बाउन्ससम्बन्धी मुद्दा कानुनी प्रक्रियामा रहेकाले यसको अन्तिम सत्य अदालतको निर्णयपछि मात्र स्पष्ट हुनेछ। तर हालसम्म सार्वजनिक भएका विवरणहरू हेर्दा यो प्रकरण केवल आर्थिक लेनदेनको विषय मात्रै नभई व्यावसायिक सम्झौता र सम्पत्ति विवादसँग पनि जोडिएको देखिन्छ।
यस विषयमा सम्बन्धित पक्षहरूको आधिकारिक धारणा र अदालतको अन्तिम निर्णय आउन बाँकी रहेको छ।
क्याटेगोरी : समाचार
प्रतिक्रिया