बालबालिकामाथि दुर्व्यवहार गरेको आरोपमा बुढानीलकण्ठस्थित इस्कोनका एक सदस्य पक्राउ
काठमाडौं । बुढानीलकण्ठस्थित इस्कोन (इस्कन) केन्द्रसँग आबद्ध सूरज कृष्ण श्रेष्ठ बालबालिकामाथि यौन दुर्व्यवहार गरेको आरोपमा पक्राउ परेका छन्।
प्रहरीका अनुसार एक बालबालिकामाथि शारीरिक तथा मानसिक यातना दिएको भन्दै परेको उजुरीका आधारमा श्रेष्ठलाई नियन्त्रणमा लिई अनुसन्धान अघि बढाइएको हो।
उजुरीमा श्रेष्ठले लामो समयदेखि बालबालिकामाथि अनुचित व्यवहार गर्दै आएको आरोप लगाइएको छ। पीडित पक्षले शारीरिक तथा मानसिक रूपमा गम्भीर असर परेको दाबी गर्दै कानुनी कारबाहीको माग गरेको छ।
प्रहरीले घटनाबारे थप प्रमाण संकलन तथा सम्बन्धित व्यक्तिहरूसँग बयान लिने कार्य जारी रहेको जनाएको छ। अनुसन्धान पूरा नभएसम्म घटनाबारे विस्तृत विवरण सार्वजनिक नगरिएको प्रहरी स्रोतले जनाएको छ।
यता, घटनाबारे इस्कोन केन्द्रको आधिकारिक प्रतिक्रिया भने सार्वजनिक भएको छैन। आरोपबारे संस्थाको धारणा बुझ्ने प्रयास भइरहेको जनाइएको छ।
प्रहरीले बालबालिकासम्बन्धी संवेदनशील विषय भएकाले अनुसन्धानको निष्कर्ष नआएसम्म तथ्य पुष्टि नभएका विवरण सार्वजनिक नगर्न आग्रह गरेको छ।
घटनाबारे थप अनुसन्धान जारी रहेको प्रहरीले जनाएको छ।
क्याटेगोरी : समाचार
प्रतिक्रिया