काठमाडौं । अमेरिकाको सर्वोच्च अदालतले राष्ट्रपति डोनाल्ड ट्रम्पले जारी गरेको जन्मसिद्ध नागरिकताको अधिकार सीमित गर्ने कार्यकारी आदेश खारेज गरेको छ। अदालतले अमेरिकामा जन्मिएका बालबालिकाले संविधानअनुसार नागरिकता प्राप्त गर्ने अधिकार कायम रहने स्पष्ट पारेको हो।
ट्रम्पले आफ्नो दोस्रो कार्यकालको पहिलो दिन अवैध रूपमा वा अस्थायी हैसियतमा अमेरिकामा बसोबास गरिरहेका अभिभावकका सन्तानलाई जन्मका आधारमा स्वतः अमेरिकी नागरिकता नदिने आदेश जारी गरेका थिए।
उक्त निर्णयविरुद्ध विभिन्न कानुनी चुनौती परेपछि तल्ला अदालतहरूले कार्यकारी आदेशको कार्यान्वयनमा रोक लगाएका थिए। अन्ततः सर्वोच्च अदालतले ६–३ को बहुमत निर्णयमार्फत जन्मसिद्ध नागरिकताको संवैधानिक व्यवस्थालाई समर्थन गरेको छ।
प्रधानन्यायाधीश जोन रोबर्ट्सले बहुमतको निर्णय प्रस्तुत गर्दै अमेरिकाको संविधानले देशभित्र जन्मिएका बालबालिकालाई उनीहरूका अभिभावकको आप्रवासन अवस्थाभन्दा माथि राखेर नागरिकताको अधिकार सुनिश्चित गरेको उल्लेख गरे।
उनले अवैध वा अस्थायी रूपमा अमेरिकामा बसोबास गरिरहेका व्यक्तिका सन्तान पनि संविधानको १४औँ संशोधनअनुसार जन्मसिद्ध अमेरिकी नागरिक हुने स्पष्ट पारे।
अमेरिका विश्वका करिब ३० देशमध्ये एक हो, जहाँ जन्मस्थानका आधारमा स्वतः नागरिकता प्रदान गर्ने व्यवस्था लागू छ। सर्वोच्च अदालतको पछिल्लो निर्णयले उक्त संवैधानिक अभ्यासलाई पुनः पुष्टि गरेको विश्लेषण गरिएको छ।
क्याटेगोरी : अन्तराष्ट्रिय
प्रतिक्रिया