प्रस्तोता : साईला भाइ
केहि समयदेखि युट्बर डान अर्थात युट्युब सुप्रिमो युट्युबसिं फत्ते मौन बर्तमा थिए । गत चुनाउमा फत्तेको गँजेडि जोखाना फेल खाएकोले आएदिन चुप लाग्ने नबोल्ने बर्त लिएको भन्नेहरुको कमी छैन । तर फत्तेको चुनावी जोखाना फेलै खाइ हालेको चैं हैन । बरु अहिले देखिएको नतिजापछि सदनको रामरमिता बारे चैं फत्तेले राम्रै फलित जोतिष निकालेका थिए । फत्तेले फू…बालेन, कर्केनी आमै, महाझुर पुन, गुण्डुबा, हर्के हल्दारलगायत थुप्रैको कायाकैरन गरेर युट्युबर धर्म निर्वाह गरेका थिए । तर यतिकैमा फत्तेको अघोर आलोचना भएपछि मौन बर्त बस्न बाध्य भए । यता युट्युबर डान मौन बस्नु उता बर्खे च्याउसरी उम्रेका नौसिखिया युट्बरले संसद भवन परिसरमा रामलीला देखाउन थाले । ‘रिखी धमला युट्युब कलेज’मा पढेका युट्युबरले आखिर रमिता त देखाउने नै थिए । यसै मेलोमा संसद सचिवालयले फत्तेको खोजी गर्यो । सचिवालयले फत्ते समक्ष ज्ञापन-पत्र बुझाएरै निम्तो गर्यो । घण्टी पार्टीले बैठकबाट अनुमोदन गर्दै फत्तेलाई सदन परिसरमा ल्याउन सविनय नम्र निवेदन गर्यो । आफ्ना सांसदको हुर्मत काड्ने नौसिखिया युट्युबरलाई तह लगाउन सक्ने फत्ते नै हुन भन्ने तिनलाई गर्भे ज्ञान छँदै थियो ।
यता धेरै दिन नबोली बस्दा वा जिब्रो निश्कृय रहँदा लठेप्रो हुने डर फत्तेलाई परेकै थियो । ऐन मौकामा संसद सचिवालयको ज्ञापन र घण्टी पार्टीको नम्र निवेदन, जिब्रो सकृय बनाउने फत्तेलाई निहुँ भयो । फत्तेले मौन बर्त तोड्ने निश्चय गर्न ढिलाढालो गरेनन् । यता युट्युबका सुप्रिमो फत्ते सदन परिसरमा आउने भएपछि नौसिखिया युट्युबर झनै हौसिए । प्रधानमन्त्री बालेन मात्रै होइन उनका मन्त्री सांसदले नौसिखियाहरुलाई ‘बाल’ नदिएपछि हैरान परेशान थिए । तीनको पेशो नै धरापमा पर्छ भन्ने लागेकै थियो । मन्त्री वाग्ले, सुधन गुरुङ्, आशिका तामाङ्ग, इलुइलुवाला दुई सांसद, अन्तराष्ट्रिय रासलीला वाला कृष्ण, साङ्ला बोकेर सांसद बनेका सुनारलाई समेत तार्लाङ्गतुर्लुङ्ग पार्दासम्म बोलबचन झरेको थिएन । यस्तो विषम परिस्थितिमा फत्ते आउने भएपछि नौसिखिया प्रफुल्ल थिए । अब जनजिविका जोगाउन फत्तेसंग अण्टसण्ट प्रश्न सोधेर ‘कण्टेण्ट क्रिएट’ गर्ने भित्रभित्रै मन बनाइ सकेका थिए नौसिखियाहरुले ।
यतिकैमा युट्युबर डन युट्युबसिं फत्ते ससंदको पटाङ्गिनीमा देखा परे । झटपट नौसिखिया युट्बरले फत्तेलाई घेरेर प्रश्न सोध्न थाली हाले ।
नौसिखिया युट्युबर : युट्युबर डान, सुप्रिमो फत्ते, बालेन नबोल्नुको कारन के हो ?
युट्युबसिं फत्ते : बालेन मौन बर्तमा बसेकै बेस । जब बर्त तोड्छन आगो ओकल्छन । बोल्यो कि पोल्यो । बोल्नासाथ आगोको लप्का निस्कन थाल्छ । हिज्जो छाडि अस्ती जस्तो लाग्छ एक पटक बोलेका मात्र थिए उनको जिब्रोबाट आगोको लप्का निस्कियो । सिंह दरबार सर्बोच्च अदालतलगायत सयौं सरकारी भवन जले । फेरी बोले भने त सिङ्गै देश जल्न बेर छैन । त्यसैले नबोलाउ । यसै त नाम नै ‘फू… बालेन’ त्यसै भएको हैन है गाँठे ।
नौसिखिया युट्युबर : बालेन बोल्दा डढेलो सल्केला ल ठीकै छ नबोलुन । तर उनका मन्त्री सांसद पनि त बोल्दैनन किन ?
युट्युबसिं फत्ते : के बोलुन त बरा बिचरा । तीनले एक थोक बोल्यो भने अर्को थोक सुनिन्छ, बुझिन्छ । यिनको मातृ भाषा नै अलग छ । तिनले हिरा भन्यो भने किरा सुनिन्छ । हस्तिनापुर भने भने सहकारीको किस्ता नतिर भनेको सुनिन्छ ।
नौसिखिया युट्युबर : उसो भए हातका औंलाले इशारा गरे वा सांकेतिक भाषा बोल्दा भयो त ।
युट्युबसिं फत्ते : त्यसले झन बिगार गर्छ । कान्छी औंला देखाए लघु संकाय (मुत्र त्याग) भन्ने बुझिन्छ । बुढी औंला देखाए ठेंगा देखायो भन्छन । चोरी औंला देखाए धाक, धम्की, धमास देखाए जस्तो हुने । माझी वा माइली औंला देखाए अश्लिल हर्कतको संकेत हुन्छ । यति गर्दा त लुगै फुकाले बराबर हुने भयो ।
नौसिखिया युट्युबर : उसो भा हामीले कसरी ‘कण्टेण्ट क्रिएट’ गर्ने ? हामी कण्टेण्ट क्रिएटरको पेशा कसरी जोगाउने ?
युट्युबसिं फत्ते : तिमेर्लाई थाहा छ कटेण्ट क्रिएटर भनेको के हो ? नेपालीमा कटेण्ट क्रिएटर भनेको सामग्री सिर्जनाकर्ता हो । तिमेरुसंग सामाग्री सिर्जना गर्ने क्षमता नै छैन । क्षमता भएको भए यहाँ हुल हुज्जत गर्न आउने नै थिएनौ । भुत्राको कण्टेण्ट क्रिएटर । को कतिखेर आउँछ र कस्को हुर्मत लिन पाइन्छ भन्ने तिमेर्को दाउ हुन्छ । कसैले बोलेनन, अनुहार पनि देखाएनन भने तिमेर्को चुलो पनि बल्दैन । तिमेरु त ‘थोपडाग्राफर’ र बोलेका कुरा पेस्ट गर्ने ‘फोटोकपी मास्टर’ हउ । आजलाइ यतिनै । चुरेरो ।
क्याटेगोरी : ब्लग, विचार
प्रतिक्रिया