काठमाडौं । जारी विश्वकपमा मुख छोपेर विपक्षी खेलाडीसँग अपमानजनक व्यवहार गरेको आरोपमा दोस्रोपटक रेड कार्ड देखाइएको छ।
घरेलु टोली मेक्सिकोविरुद्धको खेलमा इक्वेडरका डिफेन्डर पियरो हिनकेपी अतिरिक्त समयको अन्तिम क्षणमा मैदानबाट बाहिरिएका हुन्। मेक्सिकोको जित लगभग निश्चित भइसकेको अवस्थामा भएको घटनापछि रेफ्रीले भिडिओ सहायक रेफ्रीको समीक्षा गर्दै हिनकेपीलाई सिधै रेड कार्ड देखाएका थिए।
फुटबलको नयाँ नियमअनुसार खेलाडीले विवादका क्रममा मुख छोपेर अश्लील, अपमानजनक वा जातीय गाली गरेको पुष्टि भएमा सिधै रेड कार्ड दिन सकिने व्यवस्था छ। खेलाडीले मुख छोपेर बोलेका कारण उनीहरूले के भने भन्ने कुरा लुकाउने प्रवृत्ति रोक्न यो नियम लागू गरिएको हो।
यो नियम विश्वकपमा पहिलोपटक कार्यान्वयन गरिएको हो। यसअघि पनि यही प्रावधानअन्तर्गत पाराग्वेका एक खेलाडी रेड कार्डको भागीदार बनेका थिए। हिनकेपी भने उक्त नियमका आधारमा निष्कासित हुने दोस्रो खेलाडी बनेका छन्।
क्याटेगोरी : खेलकुद
प्रतिक्रिया