यमनको रणनीतिक मोखा बन्दरगाह हुथी नियन्त्रणमा पुगेको दाबी

काठमाडौं । इरान समर्थित हुथी विद्रोही समूहले लाल सागरमा रहेको यमनको रणनीतिक बन्दरगाह सहर मोखा नियन्त्रणमा लिएको रोयटर्सले जनाएको छ । बाब अल–मन्देब जलमार्गबाट ५० माइलभन्दा कम दुरीमा रहेको मोखा बन्दरगाह नियन्त्रणमा लिएको तीन हुथीविरोधी यमनी सरकारी अधिकारीलाई उद्धृत गर्दै बिहीबार रोयटर्सले जनाएको हो ।

ती सरकारी स्रोतका अनुसार, हुथी विद्रोहीहरू रणनीतिक रूपमा महत्त्वपूर्ण बाब अल–मन्देब जलमार्र्ग अघि बढ्दै लाल सागरस्थित मोखा सहरमा प्रवेश गरेका हुन् । विद्रोही बलहरू अमेरिकाको विनाश होस्, इजरायलको विनाश होस् भन्ने नारा लगाउँदै सहरमा प्रवेश गरिरहेको आफूले देखेको प्रत्यक्षदर्शीहरूले एएफपीलाई बताएका छन् ।

हुथीहरू अघि बढेपछि बिहीबार बिहान यमनी सरकारी बलहरू सहरबाट पछि हटेको अरब सञ्चारमाध्यमहरूले यसअघि रिपोर्ट गरेका थिए । सामाजिक सञ्जालमा पोस्ट गरिएका तस्बिर तथा भिडियोमा पनि सहरभित्र हुथी लडाकुहरू देखिएको दाबी गरिएको छ ।

मोखा नियन्त्रणमा आएको दाबी हुथीहरूका लागि महत्त्वपूर्ण रणनीतिक उपलब्धि हुन सक्ने देखिन्छ । यसले उनीहरूलाई लाल सागर तथा बाब अल–मन्देब जलमार्ग आसपास आफ्नो प्रभाव र नियन्त्रण थप मजबुत बनाउन सहयोग पुग्न सक्ने बताइएको छ । यद्यपि, हुथीहरूका पूर्वसहयोगी तथा यमनी सरकारका वरिष्ठ सदस्य तारेक सालेहको नेतृत्वमा रहेको हुथीविरोधी बलहरूको गठबन्धन ‘नेसनल रेजिस्टन्स फ्रन्ट’ले पनि मोखामा आफ्नो सैन्य उपस्थिति बढाउन थालेको जनाएको छ ।

‘नेसनल रेजिस्टन्स फ्रन्ट’का एक बल कमान्डरले बिहीबार बिहान मोखामा सैन्य टोलीको नेतृत्व गर्दै पुगेको उक्त समूहको आधिकारिक सञ्चारमाध्यमले जनाएको छ ।

“हुथीविरोधी गठबन्धनसँगको समन्वयमा मोखाको रक्षाका लागि बलको पुनर्गठन तथा सुदृढीकरण भइरहेको छ,” ‘नेसनल रेजिस्टन्स फ्रन्ट’को आधिकारिक सञ्चारमाध्यमले रिपोर्ट गरेको छ ।

‘नेसनल रेजिस्टन्स फ्रन्ट’का बलहरू हुथी नौसैनिक बलसँग झडपमा परेको पनि उक्त सञ्चारमाध्यमले जनाएको छ ।

यस घटनाले लाल सागर र बाब अल–मन्देब जलमार्ग आसपासको सुरक्षा अवस्था थप जटिल बन्न सक्ने संकेत गरेको बताइएको छ । विश्वको महत्त्वपूर्ण समुद्री व्यापारिक मार्गमध्ये एक रहेको बाब अल–मन्देबमा नियन्त्रण वा प्रभाव विस्तार गर्ने कुनै पनि सैन्य कदमले अन्तर्राष्ट्रिय समुद्री यातायात र क्षेत्रीय सुरक्षामा समेत असर पार्न सक्ने बताइएको छ ।