काठमाडौं। युरोपेली महारथी इंग्ल्यान्ड संयुक्त राज्य अमेरिका, क्यानडा र मेक्सिकोद्वारा संयुक्त रूपमा आयोजित फिफा विश्वकप २०२६ अन्तर्गत समूह ‘एल’ को विजेता बन्दै सानदार रूपमा नकआउट चरण (अन्तिम ३२) मा प्रवेश गरेको छ।
न्यूयोर्क न्यू जर्सीस्थित भव्य मेटलाइफ रंगशालामा भएको समूह चरणको अन्तिम तथा निर्णायक खेलमा पानामालाई २-० ले पाखा लगाउँदै इंग्ल्यान्डले समूहको शीर्ष स्थान पक्का गरेको हो। ४८ टोली सहभागी यस ऐतिहासिक र विस्तारित विश्वकपको अर्को चरणमा पुग्न इंग्ल्यान्डलाई यो जितले थप आत्मविश्वास प्रदान गरेको छ।
प्रतिस्पर्धात्मक खेलको पहिलो हाफ गोलरहित बराबरीमा सकिए पनि दोस्रो हाफमा इंग्ल्यान्डले आफ्नो रणनीतिक दबाब बढाएको थियो। इंग्ल्यान्डले खेलको ६२औं मिनेटमा पहिलो अग्रता लियो, जसमा युवा स्टार मिडफिल्डर जुड बेलिङ्घमले आकर्षक गोल गर्दै टोलीलाई अघि बढाए।
पानामाली रक्षापंक्ति सम्हालिन नपाउँदै त्यसको ठीक ५ मिनेटपछि अर्थात् ६७औं मिनेटमा अनुभवी कप्तान ह्यारी केनले उत्कृष्ट गोल गर्दै इंग्ल्यान्डको अग्रता दोब्बर बनाए। खेलको अन्तिम समयसम्म पानामाले पुनरागमनको प्रयास गरे पनि इंग्ल्यान्डको बलियो रक्षापंक्ति तोड्न सकेन र खेल इंग्ल्यान्डले आफ्नो पक्षमा पार्याे।
यो जितसँगै इंग्ल्यान्डले समूह चरणका ३ खेलबाट २ जित र १ बराबरीसहित कुल ७ अंक जोड्दै समूह विजेताको रूपमा अर्को चरणको यात्रा तय गरेको छ। यसै समूहको अर्को रोमाञ्चक खेलमा घानालाई २-१ ले पराजित गरेको क्रोएसिया ६ अंकका साथ समूहको उपविजेता बन्दै अन्तिम ३२ मा पुग्न सफल भयो।
यता पराजित भए पनि पूर्वअफ्रिकी च्याम्पियन घाना ४ अंकका साथ तेस्रो स्थानमा रहने उत्कृष्ट टोलीहरूमध्ये एक बन्दै भाग्यमानी सावित भयो र नकआउट चरणमा स्थान बनाउन सफल रह्यो । यस बलियो समूहमा परेको पानामा भने आफ्ना सबै खेलमा अंकविहीन रहँदै प्रतियोगिताको समूह चरणबाटै बाहिरिन पुगेको छ।
क्याटेगोरी : खेलकुद
प्रतिक्रिया