काठमाडौं । देशभर मनसुनी प्रणाली सक्रिय रहँदा आज पनि अधिकांश क्षेत्रमा वर्षाको सम्भावना रहेको छ। जल तथा मौसम पूर्वानुमान महाशाखाले देशका विभिन्न प्रदेशमा मेघगर्जन, चट्याङसहित वर्षा हुने तथा केही स्थानमा भारी वर्षा र हावाहुरी चल्न सक्ने भन्दै सतर्कता अपनाउन आग्रह गरेको छ।
महाशाखाका अनुसार हाल मनसुनको न्यून चापीय रेखा नेपालको पूर्वी भू-भागमा सरदर स्थानभन्दा केही दक्षिणतर्फ र पश्चिमी भू-भागमा सरदर स्थानकै आसपासमा रहेको छ। यसको प्रभावका कारण आज दिउँसो देशभर सामान्यदेखि पूर्ण बदली रहनेछ।
पूर्वानुमानअनुसार हिमाली क्षेत्रका थोरै स्थानमा मेघगर्जन र चट्याङसहित हल्कादेखि मध्यम वर्षासँगै हिमपातको सम्भावना रहेको छ। यस्तै कोशी, बागमती, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थानमा वर्षा हुने सम्भावना छ भने मधेश प्रदेश र कर्णाली प्रदेशको पहाडी क्षेत्रका थोरै स्थानमा पनि मेघगर्जन र चट्याङसहित मध्यम वर्षा हुन सक्ने महाशाखाले जनाएको छ।
देशका पहाडी भू-भागका एक–दुई स्थानमा भारी वर्षाको सम्भावना रहेको छ। साथै मधेश, लुम्बिनी र सुदूरपश्चिम प्रदेशका तराई क्षेत्रमा केही स्थानमा तीव्र गतिको हावाहुरी चल्न सक्ने भएकाले आवश्यक सावधानी अपनाउन आग्रह गरिएको छ।
आज राति पनि देशभर आंशिकदेखि सामान्य बदली रहनेछ। हिमाली क्षेत्रका थोरै स्थानमा वर्षा र हिमपातको सम्भावना रहँदा पहाडी तथा तराईका केही स्थानमा मेघगर्जन र चट्याङसहित हल्कादेखि मध्यम वर्षा हुने अनुमान गरिएको छ।
महाशाखाका अनुसार रातिको समयमा विशेषगरी कोशी प्रदेशका पहाडी तथा तराई क्षेत्रका थोरै स्थान र मधेश, बागमती, गण्डकी, लुम्बिनी तथा सुदूरपश्चिम प्रदेशका एक–दुई स्थानमा भारी वर्षा हुन सक्ने भएकाले नदी तथा खोलाको तटीय क्षेत्र, पहिरोको जोखिम भएका स्थान र यात्रा गर्नेहरूले विशेष सतर्कता अपनाउनुपर्ने देखिएको छ।
क्याटेगोरी : समाचार
प्रतिक्रिया