यमनका हुथी विद्रोहीहरूले शनिबार साउदी अरेबियाको जाजानस्थित साउदी अरामको तेल प्रशोधन केन्द्रमा तीनवटा ब्यालिस्टिक मिसाइल प्रहार गरेको दाबी गरेका छन्।प्रतिदिन करिब ४ लाख ब्यारेल कच्चा तेल प्रशोधन क्षमता रहेको उक्त रिफाइनरी लाल सागर क्षेत्रको साउदी अरेबियाको ऊर्जा उत्पादन तथा तेल निर्यात सञ्जालको महत्वपूर्ण केन्द्र मानिन्छ।
हुथीहरूको यो आक्रमण साउदी अरेबियाले हालै यमनभित्र रहेका हुथी लक्ष्यमाथि हवाई आक्रमण तीव्र बनाएपछि भएको बताइएको छ। त्यसको प्रतिकारस्वरूप साउदीको ऊर्जा पूर्वाधारलाई निशाना बनाइएको हुथी पक्षको दाबी छ।आक्रमणपछि रिफाइनरी क्षेत्रमा आगो र बाक्लो धुवाँ देखिएको भनिएका भिडियोहरू सामाजिक सञ्जालमा व्यापक रूपमा फैलिएका छन्।
यद्यपि, साउदी सरकार तथा साउदी अरामकोले हालसम्म उक्त मिसाइल आक्रमण भएको वा रिफाइनरीमा ठूलो क्षति पुगेको भन्ने दाबीको आधिकारिक पुष्टि गरेका छैनन्। त्यसैले घटनाको स्वतन्त्र पुष्टि हुन बाँकी छ।
क्याटेगोरी : अन्तराष्ट्रिय
प्रतिक्रिया