अमेरिका–इरान वार्तामा फेरि अन्योल, तेहरानले कडा सर्तबिना सम्झौता अस्वीकार्य हुने संकेत
तेहरान। अमेरिका र इरानबीच हुन सक्ने भनिएको सम्भावित सम्झौतालाई लिएर अनिश्चितताको बादल फेरि गहिरिन थालेको छ।
अमेरिकी राष्ट्रपति डोनाल्ड ट्रम्पले इरानसामु नयाँ र निकै कडा प्रस्तावहरू अघि सारेको चर्चा चलिरहेका बेला तेहरानले भने आफ्ना अधिकारहरू पूर्ण रूपमा सुरक्षित नभएसम्म कुनै पनि किसिमको सहमति सम्भव नहुने स्पष्ट पारेको छ।
इरानका शीर्ष वार्ताकारहरूले वासिङ्टनप्रति आफ्नो पुरानो अविश्वास कायमै रहेको बताएका छन्। इरानका वरिष्ठ नेता मोहम्मद बाघेर गालिबफले आइतबार राज्य टेलिभिजनमार्फत भिडियो सन्देश जारी गर्दै अमेरिकालाई सहजै विश्वास गर्न नसकिने र इरानी जनताको अधिकारको रक्षा भएको निश्चित नभएसम्म कुनै पनि सम्झौतालाई स्वीकृति नदिइने दृढता व्यक्त गरे।
ट्रम्प प्रशासनले इरानलाई परिमार्जित ‘कडा’ प्रस्ताव पठाएको भन्ने न्युयोर्क टाइम्स र एक्सियोसको रिपोर्ट सार्वजनिक भएलगत्तै उनको यो प्रतिक्रिया बाहिर आएको हो, यद्यपि उक्त प्रस्तावको विस्तृत विवरण भने अझै गोप्य नै छ।
यस सम्भावित सम्झौतालाई मध्यपूर्वमा जारी युद्धको औपचारिक अन्त्य, क्षेत्रीय तनाव न्यूनीकरण र विश्वव्यापी ऊर्जा आपूर्तिका लागि अत्यन्तै संवेदनशील मानिने हर्मुज जलघाँटी पुनः खुलाउने माध्यमका रूपमा हेरिएको छ।
क्याटेगोरी : अन्तराष्ट्रिय
प्रतिक्रिया