काठमाडौँ । धान रोपाइँको मुख्य सिजन सुरु भइरहेका बेला भारतले नेपाललाई ५० हजार मेट्रिक टन रासायनिक मल उपलब्ध गराउने भएको छ। सरकार–सरकार (जीटूजी) सम्झौताअन्तर्गत पहिलो चरणमा ३० हजार मेट्रिक टन युरिया र २० हजार मेट्रिक टन डीएपी मल सहुलियत दरमा आयात गरिनेछ।
कृषि मन्त्रालयका सहसचिव तथा कृषि सामग्री कम्पनीका अध्यक्ष डा. रामकृष्ण श्रेष्ठ का अनुसार नेपाल र भारतका सरकारी कम्पनीबीच आवश्यक सम्झौता सम्पन्न भइसकेको छ। खरिद प्रक्रिया अघि बढिसकेको तथा भुक्तानी प्रक्रिया अन्तिम चरणमा पुगेको उनले जानकारी दिए।
नेपालले कृषि सिजनलाई ध्यानमा राख्दै निर्धारित १२० दिनको आपूर्ति अवधि छोट्याउन भारतीय पक्षसँग आग्रह गरेको छ। भारतीय पक्षले पनि सकेसम्म छिटो मल उपलब्ध गराउने प्रतिबद्धता जनाएको छ।
हाल सरकारी गोदाममा युरिया र डीएपी मलको पर्याप्त मौज्दात रहे पनि बढ्दो मागलाई ध्यानमा राख्दै थप मल आयातको प्रक्रिया अघि बढाइएको सरकारले जनाएको छ। किसानलाई मल अभाव हुन नदिन यो आयात महत्वपूर्ण हुने अपेक्षा गरिएको छ।
क्याटेगोरी : समाचार
प्रतिक्रिया