चितवनमा जारी राष्ट्रिय स्वतन्त्र पार्टी (रास्वपा) को पहिलो महाधिवेशनले पार्टीभित्र विकसित हुँदै गएको समूहगत शक्ति संघर्षलाई सार्वजनिक रूपमा उजागर गरेको छ । पार्टी नेतृत्वले गुटबन्दी नगर्न आग्रह गरे पनि महाधिवेशनको बन्दसत्र, प्रतिनिधि छनोट र पदाधिकारीको दाबेदारीमा कम्तीमा तीन प्रभावशाली समूहबीच प्रतिस्पर्धा देखिएको छ ।
पार्टी सभापति रवि लामिछाने निकट संस्थापन पक्ष, प्रधानमन्त्री बालेन्द्र (बालेन) शाहसँग निकट समूह तथा पूर्व विवेकशील साझा पृष्ठभूमिका नेताहरूबीच नेतृत्व तहमा प्रभाव कायम गर्ने होड चलेको देखिन्छ ।
सभापतिमा रवि लामिछाने र वरिष्ठ नेतामा बालेन शाह सर्वसम्मत भए पनि महामन्त्री, उपसभापति र सहमहामन्त्रीलगायत पदमा उम्मेदवारी तयारी गरिरहेका नेताहरूको सक्रियताले महाधिवेशनस्थल नै चुनावी मैदानमा परिणत भएको छ ।
यता प्रतिनिधि व्यवस्थापनमा देखिएको अव्यवस्थाले बन्दसत्रसमेत प्रभावित बनेको छ । प्रतिनिधिको संख्या यकिन नहुनु, मधेस प्रदेशका प्रतिनिधिमाथि परेका उजुरी, सांसदहरूको नाम प्रतिनिधि सूचीमा नदेखिनु तथा जेनजी समूहको प्रतिनिधित्वसम्बन्धी विवादका कारण निर्धारित समयमा बन्दसत्र सञ्चालन हुन सकेन ।
विभिन्न राजनीतिक पृष्ठभूमिबाट आएका शक्ति केन्द्रहरूलाई एकै संगठनात्मक ढाँचाभित्र सन्तुलित रूपमा व्यवस्थापन गर्नु रास्वपाका लागि ठूलो चुनौती बनेको छ ।
महाधिवेशनले पार्टीको विस्तारसँगै आन्तरिक शक्ति समीकरण पनि जटिल बन्दै गएको संकेत दिएको छ । नेतृत्व चयनपछि यी समूहबीच समन्वय र सन्तुलन कायम गर्न नसके पार्टीले संगठनात्मक एकता र स्थायित्वमा थप कठिनाइ भोग्न सक्ने राजनीतिक विश्लेषकहरूको भनाइ छ ।
क्याटेगोरी : राजनीति
प्रतिक्रिया