काठमाडौं । चालु आर्थिक वर्ष २०८२/८३ को पहिलो १० महिनामा वैदेशिक रोजगारीका लागि अन्तिम श्रम स्वीकृति लिने नेपालीको संख्या उल्लेख्य रूपमा घटेको छ। मध्यपूर्वमा विकसित युद्ध र त्यसले खाडी मुलुकको श्रम बजारमा पारेको असरका कारण समीक्षा अवधिमा अन्तिम श्रम स्वीकृति लिने नेपाली १७.३ प्रतिशतले घटेर ३ लाख ३५ हजार ५१० मा सीमित भएका छन्। गत आर्थिक वर्षको सोही अवधिमा यो संख्या ४ लाख ५ हजार ६१० रहेको थियो।
अमेरिका–इजरायल र इरानबीचको द्वन्द्वपछि मध्यपूर्वमा बढेको अस्थिरताले खाडी मुलुकको रोजगारी बजार प्रभावित बनेको देखिएको छ। यसको प्रत्यक्ष असर नेपाली श्रमिकको वैदेशिक रोजगारीमा परेको तथ्याङ्कले देखाएको छ।
वैशाख मसान्तसम्मको विवरणअनुसार संयुक्त अरब इमिरेट्स (यूएई), साउदी अरेबिया, कतार, कुवेत, बहराइन, दक्षिण कोरिया, जापान, माल्दिभ्स, लेबनान तथा अफगानिस्तान जाने नेपालीको संख्या घटेको छ। सबैभन्दा ठूलो गिरावट यूएईमा देखिएको छ, जहाँ जाने नेपाली ५०.१४ प्रतिशतले घटेर ८० हजार १४५ मा झरेका छन्। साउदी अरेबिया जाने ३१.९१ प्रतिशत घटेर ४३ हजार ९२३, कतार जाने १८.४७ प्रतिशत घटेर ३३ हजार ५१, कुवेत जाने ३०.४५ प्रतिशत घटेर २२ हजार ५१४ तथा दक्षिण कोरिया जाने ४१.२७ प्रतिशत घटेर ६ हजार ६१६ पुगेका छन्।
यस्तै, जापान जाने नेपाली १०.३८ प्रतिशत घटेर १३ हजार ६६४, माल्दिभ्स जाने ३८.३३ प्रतिशत घटेर ४ हजार ११७, बहराइन जाने २२.९२ प्रतिशत घटेर ४ हजार ३४० तथा लेबनान जाने १०.५२ प्रतिशत घटेर १७ जनामा सीमित भएका छन्। अफगानिस्तानका लागि भने समीक्षा अवधिमा कसैले पनि अन्तिम श्रम स्वीकृति लिएका छैनन्।
यद्यपि केही गन्तव्य मुलुकमा नेपाली श्रमिकको आकर्षण बढेको छ। मलेसियामा अन्तिम श्रम स्वीकृति लिनेको संख्या सबैभन्दा धेरै १ हजार ७५२ प्रतिशतले वृद्धि भई ५० हजार १७६ पुगेको छ। त्यस्तै टर्कीमा २९९.२७ प्रतिशतले बढेर ४ हजार ४२०, पोल्याण्डमा १३८.४९ प्रतिशतले बढेर ६०१, ओमानमा ६४.४३ प्रतिशतले बढेर ६ हजार ८११, इजरायलमा ६२.११ प्रतिशतले बढेर ९०३, रोमानियामा २१ प्रतिशतले बढेर २२ हजार ६४१, माल्टामा १७.७३ प्रतिशतले बढेर २ हजार ५५६, जोर्डनमा ११.१५ प्रतिशतले बढेर १ हजार ७५४ तथा साइप्रसमा ८.७५ प्रतिशतले बढेर ६ हजार ३८८ पुगेका छन्।
पुनः श्रम स्वीकृति लिनेको संख्या भने बढ्यो
अर्कोतर्फ, विदेशमा कार्यरत नेपालीले पुनः श्रम स्वीकृति लिने क्रम भने बढ्दो देखिएको छ। चालु आर्थिक वर्षको १० महिनामा पुनः श्रम स्वीकृति लिनेको संख्या १६.४ प्रतिशतले वृद्धि भई ३ लाख २६ हजार ३६४ पुगेको छ। गत वर्षको सोही अवधिमा यस्तो संख्या २ लाख ८० हजार ३१४ थियो।
पुनः श्रम स्वीकृतिमा अफगानिस्तान, पोल्याण्ड, साइप्रस, माल्टा, जोर्डन, जापान, माल्दिभ्स, लेबनान, इजरायल, टर्की, रोमानिया, यूएई, ओमान, कतार तथा मलेसियामा वृद्धि देखिएको छ। मलेसियामा मात्रै ५४ हजार ८१० जनाले पुनः श्रम स्वीकृति लिएका छन् भने कतारमा ७७ हजार १५९, यूएईमा ७४ हजार ८५५ र साउदी अरेबियामा ६३ हजार ७८१ जनाले पुनः श्रम स्वीकृति लिएका छन्।
यद्यपि दक्षिण कोरिया, बहराइन, कुवेत र साउदी अरेबियामा पुनः श्रम स्वीकृति लिनेको संख्या गत वर्षको तुलनामा घटेको तथ्याङ्कले देखाएको छ।
क्याटेगोरी : समाचार
प्रतिक्रिया