काठमाडौं। नवीकरण हुन नसक्दा देशभरका दुईहजार एम्बुलेन्स थन्किएका छन् ।
स्वास्थ्य ऐन, २०७५ ले स्वास्थ्य संस्था बाहेकलाई एम्बुलेन्स सञ्चालन गर्न रोक लगाएपछि नवीकरण हुन नसक्दा ती एम्बुलेन्स थन्किएका हुन् । संयुक्त एम्बुलेन्स चालक संघका नवराज लामिछानेका अनुसार स्वास्थ्य संस्था बाहेकले सञ्चालन गरेका एम्बुलेन्स नवीकरण भएका छैनन् ।
देशभरमा ६ हजार हाराहारी एम्बुलेन्स रहेको तथ्यांक छ । तीमध्ये स्वास्थ्य संघ संस्थाले सञ्चालन गरेका एम्बुलेन्स नवीकरण भएका छन् भने गैरसरकारी संस्था र निजी क्षेत्रले सञ्चालन गरेका एम्बुलेन्स सञ्चालन हुन नसकेका हुन् ।
ऐन आएदेखि नै निरन्तर संशोधनका लागि सरकारी तबरमा पहल गर्ने काम भइरहेको अध्यक्ष लामिछानेले जानकारी दिए। तत्कालीन स्वास्थ्यमन्त्री सुधा शर्मालाई उक्त समस्याबारे अवगत गराएको अध्यक्ष लामिछानेले बताए। नयाँ सरकार गठन भएपछि स्वास्थ्य मन्त्रीसमक्ष आफ्ना समस्या राख्ने तयारीमा आफूहरु रहेको उनको भनाइ छ । ऐन संशोधन नभएमा धेरै एम्बुलेन्स थन्किने र आम नागरिकले सहज रूपमा सेवा पाउन कठिन हुने उनले बताए । अध्यक्ष लामिछानेले भने,“मानवतासँग प्रत्यक्ष जोडिएकाले यस विषयलाई नयाँ सरकारले गम्भीरताका साथ हेर्नुपर्छ ।”
यसबाट चालकको रोजगारी समेत गुमेको उनले बताए ।
क्याटेगोरी : समाचार
प्रतिक्रिया