काठमाडौँ । शिक्षा तथा खेलकुद मन्त्रालयले राष्ट्रिय खेलकुद परिषद् (राखेप) को उपाध्यक्षमा पूर्व राष्ट्रिय फुटबल टोलीका गोलकिपर विशाल श्रेष्ठलाई नियुक्त गरेको छ।
लामो समय नेपाली राष्ट्रिय फुटबल टोलीको महत्वपूर्ण सदस्यका रूपमा रहेका श्रेष्ठले खेल जीवनमा उल्लेखनीय योगदान दिएका छन्। अन्तरराष्ट्रिय फुटबलबाट सन्यास लिएपछि उनी खेल प्रशासनमा सक्रिय हुने क्रममा राखेपको नेतृत्व तहमा पुगेका हुन्।
मन्त्रालयले खेलकुद क्षेत्रको विविध प्रतिनिधित्व सुनिश्चित गर्ने उद्देश्यसहित चार जना बोर्ड सदस्यसमेत नियुक्त गरेको छ। नियुक्त हुनेहरूमा टेबलटेनिस खेलाडी सिक्का सुवाल, पूर्व अन्तरराष्ट्रिय क्रिकेट खेलाडी तथा प्रशिक्षक शक्ति गौचन, बुद्धिचाल खेलाडी मोनालिसा खुम्बु र फुटबल खेलाडी पवन शाही रहेका छन्।
खेलकुद प्रशासनमा अनुभवी खेलाडीहरूको सहभागिता बढाउने उद्देश्यले गरिएको यो नियुक्तिलाई सकारात्मक रूपमा हेरिएको छ। नवनियुक्त पदाधिकारीहरूले खेलकुद क्षेत्रको विकास, सुशासन, व्यवस्थापन तथा नीतिगत सुधारमा महत्वपूर्ण भूमिका निर्वाह गर्ने अपेक्षा मन्त्रालयले गरेको छ।
राखेप नेपाली खेलकुदको सर्वोच्च सरकारी निकाय भएकाले यसका पदाधिकारीहरूको भूमिका खेलकुद नीति निर्माण, कार्यक्रम सञ्चालन तथा समग्र खेलकुद विकासका लागि महत्वपूर्ण मानिन्छ।
क्याटेगोरी : खेलकुद
प्रतिक्रिया