अमेरिकामा तीन वर्षयताकै उच्च महँगी : ट्रम्प भन्छन्– ‘मलाई मुद्रास्फीति मन पर्छ’
काठमाडौं । अमेरिकामा उपभोक्ता महँगी (मुद्रास्फीति)को दर विगत तीन वर्षयताकै सबैभन्दा तीव्र गतिमा बढेको छ। अमेरिकी श्रम तथ्यांक ब्यूरोले सार्वजनिक गरेको पछिल्लो तथ्यांकअनुसार मे महिनामा उपभोक्ता मूल्यहरू वार्षिक रूपमा ४.२ प्रतिशतले बढेका छन् । यसअघि अप्रिल महिनामा यो वृद्धिदर ३.८ प्रतिशत रहेको थियो ।
यसरी मुद्रास्फीतिको तथ्यांक ऐतिहासिक रूपमा उच्च बिन्दुमा पुगेपछि अमेरिकी राष्ट्रपति डोनाल्ड ट्रम्पले दिएको एउटा अभिव्यक्तिले नयाँ बहस र तरङ्ग सिर्जना गरिदिएको छ ।
महँगीको नयाँ तथ्याङ्क जारी भएलगत्तै ह्वाइट हाउसमा आयोजित एक कार्यक्रममा राष्ट्रपति ट्रम्पले भने, ‘तपाईंलाई थाहा छ मलाई वास्तवमा के मन पर्छ ? मलाई यो मुद्रास्फीति मन पर्छ ।’
आगामी नोभेम्बरमा हुने मध्यावधि चुनावअघि मतदाताहरूले अर्थतन्त्रलाई मुख्य चासोको विषय मानेको र ट्रम्पलाई यस मामिलामा कम अंक दिइरहेका बेला उनको यो टिप्पणी निकै अनपेक्षित थियो । उनको यो क्यामरा अगाडिको भनाइ सार्वजनिक भएको केही मिनेटमै डेमोक्रेटहरूले यसलाई सामाजिक सञ्जालमा व्यापक प्रचार गर्न थाले ।
सिनेटमा डेमोक्रेटिक नेता चक शुमरले एक्समा लेखे, ‘ट्रम्पले साँच्चै मलाई महँगी मन पर्छ भने, त्यो पनि क्यामरा अगाडि पूरै अमेरिकाले सुन्ने गरी । जनताप्रति उनको घृणाको कुनै सीमा छैन ।’
त्यस्तै, सदनका डेमोक्रेटिक नेता हकिम जेफ्रिजले ट्रम्पको यो अभिव्यक्तिमाथि व्यंग्य गर्दै भने, ‘अन्ततः हामीले डोनल्ड ट्रम्पले आफैंलाई जति नै माया गर्ने अर्को चिज फेला पार्यौं, त्यो हो महँगी ।’
सन् २०२४ को चुनावमा महँगीलाई छिट्टै परास्त गर्ने वाचा गरेका ट्रम्पको अहिलेको तर्क भने के छ भने बढेको मूल्य केवल इरान युद्धले ऊर्जाको लागत बढाएका कारण मात्र हो । बुधबार उनले राहतको संकेत दिँदै एउटा गोप्य सैन्य अप्रेसनमार्फत हर्मुज जलयोजकबाट १० करोड ब्यारल तेल ओसारिएको दाबी गरे । विश्वको २० प्रतिशत तेल आपूर्ति हुने यो मुख्य जलयोजक फेब्रुअरीको अन्त्यदेखि युद्धका कारण बन्द प्रायः छ ।
ट्रम्पले यो गोप्य मिशनकै कारण अप्रिलको सुरुमा प्रति ब्यारल ११० डलर पुगेको तेलको मूल्य घटेर ९० डलरभन्दा तल आएको दाबी गरे । उनले आफूले पहिलोपटक यो कुरा सार्वजनिक गरेको र हरेक रात लाखौं ब्यारल तेल सुरक्षित रूपमा बजारमा पुर्याइरहेको बताए ।
तर, ट्रम्पले दाबी गरेको यस तथ्यांकलाई पुष्टि गर्ने कुनै स्वतन्त्र तथ्यांक तत्काल उपलब्ध छैन र यसमा अमेरिकी सेनाको भूमिका के थियो भन्ने पनि स्पष्ट छैन । सन्दर्भका लागि, युद्धअघि सो जलयोजकबाट दैनिक औसत २ करोड ब्यारल तेल ओसारिने गरिन्थ्यो जसको अर्थ ट्रम्पको मिशनले केवल पाँच दिनको सामान्य आपूर्ति बराबरको तेल ओसारेको देखिन्छ ।
नयाँ महँगी रिपोर्टप्रति प्रतिक्रिया दिँदै ह्वाइट हाउसले मे महिनामा नयाँ गाडी, प्रेसक्रिप्सन औषधी र सवारी बिमाको मूल्य घटेको कुरालाई सकारात्मक पक्षका रूपमा औंल्याएको छ । तर, समग्र महँगी र औसत ज्यालाको तुलना गर्दा सर्वसाधारणको खर्च गर्ने वास्तविक क्षमतामा भने गिरावट आएको देखिन्छ ।
अमेरिकाले इरानमाथि हवाई हमला गरेको र तेहरानले पनि क्षेत्रका अन्य देशहरूमा जवाफी कारबाही गरिरहेका बेला बुधबार अमेरिकी कच्चा तेलको मूल्य ४ प्रतिशतले बढेर प्रति ब्यारल झण्डै ९२ डलर पुगेर बन्द भएको छ । यसले के देखाउँछ भने ट्रम्पको महँगी प्रेम र तेल मिशनका दाबीहरूका बीच बजारमा अनिश्चितता अझै कायम छ ।
क्याटेगोरी : अन्तराष्ट्रिय
प्रतिक्रिया