काठमाडौं । सुरक्षित रगतको उपलब्धता सुनिश्चित गर्न जनचेतना अभिवृद्धि गर्ने तथा रक्तदाताहरूको योगदानको सम्मान गर्ने उद्देश्यले आज देशभर विभिन्न कार्यक्रमका साथ विश्व रक्तदाता दिवस मनाइँदैछ।
हरेक वर्ष जुन १४ मा मनाइने यस दिवसका अवसरमा नेपालका विभिन्न सरकारी तथा गैरसरकारी संस्था, अस्पताल, सामाजिक संघसंस्था र युवा क्लबहरूले रक्तदानसम्बन्धी सचेतनामूलक कार्यक्रम सञ्चालन गरिरहेका छन्।
दिवसको मुख्य उद्देश्य सुरक्षित रगत तथा रगतजन्य उत्पादनहरूको आवश्यकता र महत्त्वबारे आम नागरिकलाई जानकारी गराउनुका साथै स्वस्थ व्यक्तिहरूलाई नियमित रक्तदानमा सहभागी हुन प्रेरित गर्नु रहेको छ। साथै, निरन्तर रूपमा रक्तदान गर्दै आएका रक्तदाताहरूको योगदानको कदर गर्ने अवसरका रूपमा पनि यो दिवसलाई लिइन्छ।
चिकित्सा क्षेत्रमा रगतको कुनै कृत्रिम विकल्प नभएकाले आपत्कालीन अवस्था, दुर्घटना, शल्यक्रिया तथा विभिन्न रोगको उपचारका क्रममा रगतको आवश्यकता अत्यन्त महत्वपूर्ण रहने गर्दछ। समयमै पर्याप्त रगत उपलब्ध नहुँदा हुने मानवीय क्षति न्यूनीकरण गर्न रक्तदान अभियानले महत्वपूर्ण भूमिका खेल्ने विश्वास गरिएको छ।
दिवसका अवसरमा विभिन्न स्थानमा रक्तदान कार्यक्रम, अन्तरक्रिया, जनचेतनामूलक अभियान तथा नयाँ रक्तदातालाई प्रोत्साहन गर्ने कार्यक्रमहरू आयोजना गरिएका छन्।
रक्तदानको क्षेत्रमा सक्रिय संस्था ब्लड डोनर्स एसोसिएसन नेपाल लगायतका संघसंस्थाले पनि विशेष कार्यक्रममार्फत दिवस मनाइरहेका छन्। यस्ता अभियानले मुलुकमा देखिने रगतको अभाव कम गर्न तथा आवश्यक पर्दा सुरक्षित रगतको सहज उपलब्धता सुनिश्चित गर्न सहयोग पुग्ने अपेक्षा गरिएको छ।
क्याटेगोरी : समाचार
प्रतिक्रिया