विश्वकप तयारीमा इङ्गल्याण्डलाई झट्का, प्रशिक्षण सामग्री ढुवानी गर्ने गाडीमा चोरी
फिफा विश्वकप २०२६ को तयारीमा रहेको इङ्गल्याण्ड फुटबल टोलीलाई अप्रत्याशित झट्का लागेको छ। टोलीका प्रशिक्षण सामग्री बोकेको गाडीमा तोडफोड गरी केही उपकरण चोरी भएको स्थानीय प्रहरीले जनाएको छ।
घटना फ्लोरिडास्थित इङ्गल्याण्डको पूर्वअभ्यास क्याम्पबाट क्यान्सास सिटीको स्वोप सकर भिलेजतर्फ सामग्री ढुवानी गर्ने क्रममा भएको बताइएको छ। टोली शनिबार क्यान्सास सिटी आइपुग्नुअघि प्रशिक्षणका लागि आवश्यक सबै सामग्री तयारी अवस्थामा राख्ने योजना थियो।
प्रहरीका अनुसार गाडीमा तोडफोड गरिएपछि केही प्रशिक्षण उपकरण हराएको पाइएको छ। घटनाको अनुसन्धान जारी रहेको जनाउँदै अधिकारीहरूले चोरीमा संलग्न भएको आशंकामा दुई जनालाई नियन्त्रणमा लिइएको जानकारी दिएका छन्।
अन्तर्राष्ट्रिय सञ्चारमाध्यम रोयटर्सका अनुसार चोरी भएका सामग्रीमध्ये प्रशिक्षणमा प्रयोग हुने बल र खेलाडीका बुटहरू समेत रहेका छन्। यद्यपि हराएका सबै सामग्रीको विस्तृत विवरण सार्वजनिक गरिएको छैन।
इङ्गल्याण्ड फिफा विश्वकप २०२६ अन्तर्गत समूह ‘एल’ मा रहेको छ। उक्त समूहमा क्रोएसिया, घाना र पानामा पनि रहेका छन्।
मुख्य प्रशिक्षक थोमस टुचेलको नेतृत्वमा रहेको इङ्गल्याण्ड टोली कप्तान ह्यारी केनसहित २६ सदस्यीय टोलीका साथ प्रतियोगिताको तयारीमा जुटिरहेको छ। चोरीको घटनाले टोलीको तयारीमा केही असर पार्न सक्ने भए पनि प्रतियोगिताअघि आवश्यक व्यवस्थापन गरिने अपेक्षा गरिएको छ।
क्याटेगोरी : खेलकुद
प्रतिक्रिया