काठमाडौं । इरानका पूर्व सर्वोच्च नेता आयातोल्लाह अली खामेनीको राजकीय अन्तिम संस्कार आजदेखि औपचारिक रूपमा सुरु हुने भएको छ। इरानी अधिकारीहरूका अनुसार जुलाई ४ देखि ९ सम्म सञ्चालन हुने शोक कार्यक्रम देशको इतिहासकै सबैभन्दा ठूलो राजकीय समारोहमध्ये एक हुने अपेक्षा गरिएको छ।
गत फेब्रुअरी २८ मा तेहरानस्थित निवासमा भएको अमेरिकी–इजरायली संयुक्त हवाई आक्रमणमा ८६ वर्षीय खामेनीको मृत्यु भएको थियो। उक्त घटनामा उनका परिवारका अन्य सदस्यहरूको पनि ज्यान गएको बताइएको छ। क्षेत्रीय तनाव र युद्धका कारण स्थगित भएको अन्तिम संस्कार हालै भएको युद्धविरामपछि मात्र सम्भव भएको इरानी सञ्चारमाध्यमहरूले जनाएका छन्।तेहरान महानगरका अधिकारीहरूका अनुसार राजधानीमा मात्रै एक करोड ५० लाखदेखि दुई करोडसम्म मानिस सहभागी हुन सक्ने अनुमान गरिएको छ। राजधानीमा निकालिने मुख्य शवयात्रा २४ घण्टाभन्दा लामो समयसम्म चल्न सक्ने बताइएको छ।
ठूलो जनसहभागिता र सुरक्षा चुनौतीलाई मध्यनजर गर्दै इस्लामिक रिभोलुसनरी गार्ड कर्प्स (आईआरजीसी) ले देशभर उच्च सतर्कता अपनाएको छ। तेहरानका प्रमुख प्रवेश नाकाहरूमा सुरक्षा व्यवस्था थप कडा पारिएको जनाइएको छ।अन्तिम संस्कारमा विश्वका विभिन्न मुलुकका उच्चस्तरीय प्रतिनिधिमण्डल सहभागी हुने भएका छन्। इरानी सञ्चारमाध्यमहरूका अनुसार ३० भन्दा बढी देशका राजनीतिक नेतृत्व र ९० भन्दा बढी राष्ट्रका धार्मिक प्रतिनिधिहरू समारोहमा सहभागी हुने अपेक्षा गरिएको छ।
रुस, चीन र पाकिस्तानले आधिकारिक प्रतिनिधिमण्डल पठाउने पुष्टि गरिसकेका छन् भने भारतबाट पनि धार्मिक तथा कूटनीतिक टोली तेहरान पुगेको जनाइएको छ। छिमेकी इराकबाट ठूलो सङ्ख्यामा श्रद्धाञ्जली कार्यक्रममा सहभागी हुने तयारी गरिएको छ।
यस्तो छ अन्तिम संस्कारको कार्यतालिका
आधिकारिक कार्यक्रमअनुसार जुलाई ४ र ५ मा तेहरानस्थित इमाम खोमेनी ग्रान्ड मोसल्लामा सर्वसाधारण तथा विदेशी प्रतिनिधिका लागि अन्तिम श्रद्धाञ्जली कार्यक्रम सञ्चालन हुनेछ।
जुलाई ६ मा राजधानी तेहरानमा विशाल सार्वजनिक शवयात्रा निकालिनेछ भने जुलाई ७ मा धार्मिक सहर कोममा विशेष प्रार्थना र श्रद्धाञ्जली कार्यक्रम आयोजना गरिनेछ।
जुलाई ९ मा उत्तरपूर्वी सहर मशहादस्थित पवित्र इमाम रेजा धार्मिक परिसरमा पूर्ण राजकीय सम्मानका साथ अन्तिम संस्कार सम्पन्न गरिने कार्यक्रम तय गरिएको छ।यो समारोह नयाँ सर्वोच्च नेता मोज्ताबा खामेनीको नेतृत्वमा हुने पहिलो ठूलो राजकीय कार्यक्रमका रूपमा पनि हेरिएको छ। विश्लेषकहरूका अनुसार यस अवसरलाई इरानले आन्तरिक स्थायित्व र अन्तर्राष्ट्रिय समर्थन प्रदर्शन गर्ने माध्यमका रूपमा प्रयोग गर्न खोजेको छ।सन् २०२० मा कमाण्डर कासिम सुलेमानीको अन्तिम संस्कारका क्रममा भएको भीड व्यवस्थापन समस्यालाई ध्यानमा राख्दै यसपटक हजारौँ स्वयंसेवक, स्वास्थ्यकर्मी र सुरक्षा संयन्त्र परिचालन गरिएको इरानी प्रशासनले जनाएको छ।
क्याटेगोरी : अन्तराष्ट्रिय
प्रतिक्रिया