काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशन नजिकिँदै गर्दा पार्टी सभापति रवि लामिछाने पुनः नेतृत्वमा दोहोरिने सम्भावनाबारे चर्चा सुरु भएको छ।
पार्टी विधानअनुसार सभापतिको एक कार्यकाल पाँच वर्षको रहने र एक व्यक्ति लगातार दुई कार्यकालसम्म सभापति बन्न सक्ने व्यवस्था रहेको बताइएको छ। सोही व्यवस्थाअनुसार लामिछाने पुनः सभापतिमा निर्वाचित भए आगामी पाँच वर्षसम्म पार्टीको नेतृत्वमा रहनेछन्।
हालसम्म सभापति पदका लागि अन्य कुनै औपचारिक दाबेदारी सार्वजनिक नभएकाले लामिछाने सर्वसम्मत रूपमा चयन हुन सक्ने चर्चा पार्टी वृत्तमा चलिरहेको छ। यद्यपि, यसबारे पार्टीले औपचारिक निर्णय भने गरिसकेको छैन।
रास्वपाको स्थापना र विस्तारमा लामिछानेको महत्वपूर्ण भूमिका रहेको भन्दै समर्थकहरूले उनको नेतृत्वलाई निरन्तरताको पक्षमा तर्क गरिरहेका छन्। पार्टीका विभिन्न तहमा महाधिवेशनको तयारी तीव्र बनाइएको छ भने प्रदेश अधिवेशनहरू पनि सञ्चालन भइरहेका छन्।
महाधिवेशनमार्फत नयाँ नेतृत्व चयनसँगै संगठनात्मक संरचना, नीति तथा विधानका विषयमा समेत महत्वपूर्ण निर्णय हुने अपेक्षा गरिएको छ। पार्टीभित्र विभिन्न पदमा आकांक्षीहरूको संख्या बढेकाले व्यवस्थापन चुनौतीपूर्ण बनेको नेताहरूको भनाइ छ।
केही प्रदेशमा संगठनात्मक विवादका कारण अधिवेशन प्रक्रिया प्रभावित भएको चर्चा भए पनि पार्टी नेतृत्वले निर्धारित समयभित्र सबै प्रदेश अधिवेशन सम्पन्न गर्ने तयारी गरिरहेको जनाएको छ।
यसैबीच, महाधिवेशनपछि पार्टीको नेतृत्व संरचना, आन्तरिक व्यवस्थापन तथा आगामी राजनीतिक रणनीतिबारे थप स्पष्टता आउने अपेक्षा गरिएको छ।
क्याटेगोरी : राजनीति
प्रतिक्रिया