कांग्रेसले एमालेलाई दुई पटक फुटायो, तर हामी चाहन्छौँ कांग्रेस नफुटोस् : विष्णु रिजाल

नेकपा एमालेका नेता विष्णु रिजालले नेपाली कांग्रेस आन्तरिक विभाजनको डिलमा पुगेको टिप्पणी गरेका छन्। उनले कांग्रेसले विगतमा नेकपा एमाले दुई पटक विभाजन गराएको उल्लेख गर्दै अहिले भने कांग्रेस नफुटोस् भन्ने आफ्नो चाहना रहेको बताएका छन्।

‘कांग्रेसले एमालेलाई दुई पटक फुटायो। तर, हामी चाहन्छौँ– कांग्रेस नफुटोस्,’ रिजालले भनेका छन्।

रिजालले सामाजिक सञ्जालमार्फत २०५४ फागुन २१ गते तत्कालीन सभामुख रामचन्द्र पौडेलले महेन्द्रनगरबाट हेलिकोप्टर चढेर काठमाडौं आएर हतार–हतार नेकपा एमाले विभाजन गरी नेकपा माले दर्ता गराएको बताए।

त्यस्तै, २०७८ भदौ ९ गते तत्कालीन प्रधानमन्त्री शेरबहादुर देउवाले राजनीतिक दल विभाजनका लागि आवश्यक सदस्य संख्या ४० प्रतिशतबाट घटाएर २० प्रतिशत कायम हुने गरी अध्यादेश जारी गरेको र त्यसपछि नेकपा (एकीकृत समाजवादी) गठन भएको उल्लेख गरेका छन्। उक्त अध्यादेश असोज ११ गते खारेज गरिएको पनि रिजालले बताए।

'२०५४ फागुन २१ गते सभामुख रामचन्द्र पौडेल महेन्द्रनगरबाट हेलिकोप्टर चढेर काठमाडौं आएर हतार–हतार नेकपा (एमाले) फुटाएर नेकपा (माले) दर्ता गरिदिनुभयो भने २०७८ भदौ ९ मा प्रधानमन्त्री शेरबहादुर देउवाले ४० प्रतिशतबाट आधा घटाएर २० प्रतिशत सदस्य भए पार्टी फुटाउन पाउने अध्यादेश जारी गरेर एमाले फुटाइदिनुभयो र नेकपा (एकीकृत समाजवादी) गठन भयो, जुन अध्यादेश असोज ११ गते आफैँ खारेज गर्नुभयो,' उनले उल्लेख गरेका छन्।

रिजालले अहिले नेपाली कांग्रेस विभाजनको डिलमा उभिएको उल्लेख गर्दै कांग्रेस सभापति शेरबहादुर देउवा जीवनको उत्तरार्द्धमा अलग्गै पार्टी बनाउने मनस्थितिमा रहेको दाबी गरेका छन्।

विगतमा देउवाले गठन गरेको नेपाली कांग्रेस (प्रजातान्त्रिक) अन्ततः तत्कालीन सभापति गिरिजाप्रसाद कोइरालाको नेतृत्वमा रहेको नेपाली कांग्रेसमै समाहित भएको प्रसंग जोड्दै रिजालले अब छुट्टै पार्टी बनाएर देउवा कहाँसम्म अघि बढ्न सक्लान् भन्ने प्रश्नसमेत गरेका छन्।

'आज कांग्रेस विभाजनको डिलमा उभिएको छ। शेरबहादुर देउवा जीवनको उत्तरार्द्धमा अलग्गै पार्टी बनाउने मुडमा हुनुहुन्छ,' उनले भने, 'रगत–बखत भएको बेला बनाएको प्रजातान्त्रिक कांग्रेस त गिरिजाप्रसाद कोइरालालाई नै बुझाउनुपर्यो भने अब के पार लाग्ला र?'