मनसुन जोखिम व्यवस्थापनमा सडक विभागको उच्च सतर्कता, २७७ उपकरण तयारी अवस्थामा

यस वर्षदेखि सडक विभागले सूचना व्यवस्थापन र समन्वयमा आधुनिक प्रविधिको प्रयोगलाई तीव्र बनाएको छ। महानिर्देशकका अनुसार ‘सेतु’ नामक सफ्टवेयरमार्फत देशभर रहेका २७७ वटा हेभी इक्विपमेन्ट र अपरेटरहरूको लाइभ लोकेसन ट्र्याक गर्ने व्यवस्था मिलाइएको छ।

यान्त्रिक महाशाखा र सिभिल डिभिजन कार्यालयहरूबीच समन्वय गरी जोखिमयुक्त क्षेत्र नजिकै उपकरणहरू तयारी अवस्थामा राखिएको विभागले जनाएको छ।

नेपालको भौगोलिक संवेदनशीलतालाई ध्यानमा राख्दै पहिरोको उच्च जोखिम रहेका स्थानहरू पहिचान गरिएको छ। यद्यपि बजेट र क्षमताका सीमितताका कारण सबै स्थानमा स्थायी रोकथाम सम्भव नभए पनि प्रमुख पहिरो क्षेत्रमा संरचनागत सुधारका काम अघि बढाइएको छ।

नागढुङ्गा–मुग्लिन, नारायणगढ–मुग्लिन र कान्ति लोकपथका प्रमुख पहिरो क्षेत्रमा बायो–इन्जिनियरिङ, रक एङ्करिङ र सर्टक्रिटिङ प्रविधि प्रयोग गरी स्थिरीकरण गरिएको विभागले जनाएको छ।

त्यस्तै झ्याप्ले खोला, महेश खोला र कृष्णभीर जस्ता पुराना तथा जटिल पहिरोहरू नियन्त्रणमा लिइएको छ भने नारायणगढ–मुग्लिन खण्डको तुइन खोला र कान्ति लोकपथका केही स्थानमा काम जारी रहेको विभागले स्पष्ट पारेको छ।