काठमाडौं। मध्यपूर्वमा जारी युद्धका कारण इन्धनको मूल्य तीव्र रूपमा बढेपछि एशियाली देशहरूमा विद्युतीय सवारीसाधनको माग उल्लेखनीय रूपमा वृद्धि भएको छ । पेट्रोलियम पदार्थमा निर्भर राष्ट्रहरूमा आपूर्ति घट्नु र विकल्पको अभाव हुनुका कारण उपभोक्ताहरू सस्तो र दीर्घकालीन विकल्पतर्फ आकर्षित भएका छन् ।
दक्षिण–पूर्वी एशियाका देशहरूमा विशेष गरी विद्युतीय गाडीको बिक्री ह्वात्तै बढेको छ । भियतनाममा विद्युतीय सवारी निर्माता विनफास्टले वार्षिक बिक्रीमा १२७ प्रतिशत वृद्धि गरेको जनाएको छ । मार्च महिनामा मात्र कम्पनीले २७ हजार ६ सय गाडी बिक्री गरेको छ । शोरुमहरूमा ग्राहकको भीड बढेसँगै बिक्री समयसमेत लम्ब्याइएको छ ।
इन्धनको मूल्य करिब ५० प्रतिशतले बढेर प्रति ब्यारेल १०० डलर नाघेपछि उपभोक्ताहरूले खर्च घटाउने उपाय खोजिरहेका छन् । दैनिक प्रयोगका लागि गाडी चलाउनेहरूले विद्युतीय सवारीलाई बढी किफायती विकल्पका रूपमा हेर्न थालेका छन् । पेट्रोल हाल्न लाइन बस्नुपर्ने झन्झट र महँगो खर्चबाट बच्न पनि मानिसहरू विद्युतीय गाडीतर्फ आकर्षित भएका हुन् ।
थाइल्याण्ड, फिलिपिन्सलगायत देशहरूमा पनि चिनियाँ कम्पनीहरूको विद्युतीय गाडीको बिक्री तीव्र रूपमा बढिरहेको छ । विशेष गरी बीवाइडीले अटो शोहरूमा अग्रस्थान हासिल गर्दै जापानी कम्पनीहरूलाई समेत पछि पार्न थालेको छ ।
ऊर्जा संकटसँगै चार्जिङ पूर्वाधार विस्तार र सरकारी नीतिगत सहयोगले पनि विद्युतीय सवारीको माग बढाउन भूमिका खेलेको विश्लेषकहरू बताउँछन् । यसले दीर्घकालीन रूपमा एशियामा सवारी क्षेत्रको संरचनात्मक परिवर्तनलाई गति दिने संकेत देखिएको छ ।
क्याटेगोरी : समाचार
प्रतिक्रिया