गृहमन्त्री सुधन गुरुङको हातमा सयौं भ्रष्टाचारी नेताको नाम,खोल्दै छन् ठुला ठुला फाइल
काठमाडौं । करिब दुई महिनाको अन्तरालपछि सुधन गुरुङ पुनः गृहमन्त्रीको जिम्मेवारीमा फर्किएका छन्। छानबिन प्रक्रियाबाट आफू निर्दोष रहेको निष्कर्ष सार्वजनिक भएपछि उनी पुनः मन्त्रालयको नेतृत्वमा आएका हुन्।
यसअघि गृहमन्त्री नियुक्त भएको २४ घण्टा नबित्दै उच्च राजनीतिक तहका व्यक्तिहरूमाथि कारबाही प्रक्रिया अघि बढाएर चर्चामा आएका गुरुङ छोटो समयमै जनस्तरमा परिचित बनेका थिए। उनी जेनजी राजनीतिक धाराका प्रमुख नेतामध्ये एक मानिन्छन् र अघिल्लो सरकार गठनमा समेत उनको भूमिका महत्वपूर्ण रहेको बताइन्छ।
नयाँ सरकार गठनको क्रममा गुरुङ गृह मन्त्रालयको प्रमुख दाबेदारका रूपमा चर्चामा थिए। कतिपयले उनलाई पर्यटन मन्त्रालयको जिम्मेवारी दिइने अनुमान गरे पनि अन्ततः उनी गृहमन्त्रीकै रूपमा नियुक्त भएका थिए।
गृह मन्त्रालयमा रहँदा उनले विभिन्न प्रशासनिक तथा नीतिगत सुधारका काम अघि बढाएको दाबी गरिन्छ। यद्यपि पैतृक सम्पत्ति र शेयर लगानीसम्बन्धी विषयमा उठेका प्रश्नपछि उनले नैतिकताको आधारमा पदबाट राजीनामा दिएका थिए।
पुनः मन्त्रालय फर्किएसँगै गुरुङले विभिन्न महत्वपूर्ण फाइलहरूको अध्ययन र छानबिनलाई तीव्रता दिने तयारी गरेको मन्त्रालय स्रोतले जनाएको छ। स्रोतका अनुसार लामो समयदेखि विचाराधीन रहेका सयभन्दा बढी फाइलहरू अहिले उनको प्राथमिकतामा छन्।
पदभार ग्रहण गरेपछि गुरुङले २०५८ सालको दरबार हत्याकाण्ड सम्बन्धी विषयमा समेत आवश्यक अध्ययन र सत्यतथ्य उजागर गर्न पहल गर्ने संकेत दिएका छन्। उक्त घटनाबारे विगतदेखि नै निष्पक्ष र गहिरो अनुसन्धान हुन नसकेको भन्दै विभिन्न तहबाट प्रश्न उठ्दै आएको छ।
गुरुङको पुनरागमनसँगै गृह मन्त्रालयभित्र पनि उत्साह देखिएको बताइन्छ। मन्त्रालयका कर्मचारीहरूले उनको स्वागत गर्दै आगामी दिनमा मन्त्रालयको कामकारबाही थप प्रभावकारी हुने अपेक्षा व्यक्त गरेका छन्।
उनको पुनः नियुक्तिपछि राजनीतिक वृत्तमा समेत विभिन्न टिप्पणी र चर्चा सुरु भएको छ। आगामी दिनमा गृह मन्त्रालयले कुन-कुन मुद्दालाई प्राथमिकता दिन्छ भन्ने विषयलाई विशेष चासोका साथ हेरिएको छ।
क्याटेगोरी : समाचार
प्रतिक्रिया