फेसबुक उदयको कथामा ‘द सोसल रेकनिङ’ को ट्रेलर : जुकरबर्गको भूमिकामा जेरेमी स्ट्रङ
प्रविधि उद्योगको उत्थान र सामाजिक सञ्जालको प्रभावलाई पर्दामा उतारेको चर्चित फिल्म ‘द सोशल नेटवर्क’ को सिक्वेल आउने भएको छ। पहिलो फिल्म प्रदर्शन भएको १६ वर्षपछि सोनी पिक्चर्सले ‘द सोशल रेकनिङ’ नामक नयाँ श्रृंखलाको ट्रेलर सार्वजनिक गर्दै दर्शकमाझ नयाँ बहसको संकेत दिएको हो।
सन् २०१० मा रिलिज भएको ‘द सोशल नेटवर्क’ ले फेसबुकको सुरुआती यात्रा, संस्थापक मार्क जुकरबर्गको उदय र कम्पनी निर्माणका क्रममा उत्पन्न विवादलाई केन्द्रमा राखेको थियो। नयाँ सिक्वेलले भने फेसबुक विश्वकै प्रभावशाली डिजिटल प्लेटफर्म बनेपछि उसले समाज, राजनीति र युवापुस्तामाथि पारेको प्रभावको कथा प्रस्तुत गर्नेछ।
फिल्मको कथा फेसबुककी पूर्व इन्जिनियर फ्रेन्सेस हाउगेन र द वाल स्ट्रिट जर्नलका पत्रकार जेफ होर्विट्जको अनुसन्धानमा आधारित छ। उनीहरूको पहलमा सार्वजनिक भएको ‘द फेसबुक फाइल्स’ ले कम्पनीभित्र रहेका अनेक संवेदनशील तथ्य बाहिर ल्याएको थियो।
अनुसन्धानका क्रममा फेसबुक र इन्स्टाग्रामका एल्गोरिदमले किशोरकिशोरीहरूको मानसिक स्वास्थ्यमा नकारात्मक प्रभाव पारेको, गलत सूचना र विभाजनकारी सामग्रीको प्रसारलाई बढावा दिएको तथा राजनीतिक ध्रुवीकरणमा समेत भूमिका खेलेको दाबी गरिएको थियो। ती खुलासापछि विश्वभर फेसबुकको जिम्मेवारी, नियमन र पारदर्शिताबारे व्यापक बहस सुरु भएको थियो।
यसपटक फिल्मले केवल एक कम्पनीको सफलताको कथा मात्र होइन, डिजिटल युगमा प्रविधिको शक्ति, जिम्मेवारी र त्यसका सामाजिक परिणाममाथि प्रश्न उठाउने अपेक्षा गरिएको छ। यही कारणले पनि हलिउड वृत्तमा ‘द सोशल रेकनिङ’ लाई पछिल्लो दशककै सबैभन्दा प्रतीक्षित प्रविधि–आधारित फिल्ममध्ये एक मानिएको छ।
मूल फिल्मका लेखक तथा अस्कर विजेता पटकथाकार आरोन सोर्किन सिक्वेलमा लेखक र निर्देशक दुवै भूमिकामा फर्किएका छन्। ट्रेलर सार्वजनिक कार्यक्रममा उनले सामाजिक सञ्जालको प्रभाव आज विश्वका हरेक क्षेत्रसँग जोडिएको भन्दै यसको अर्को अध्यायलाई पर्दामा उतार्न आवश्यक भएको बताएका छन्।
‘द सोशल नेटवर्क’ ले प्रदर्शनका क्रममा विश्वभर २२ करोड ६० लाख अमेरिकी डलरभन्दा बढी कमाइ गरेको थियो। उत्कृष्ट चलचित्रसहित आठ अस्कर मनोनयन प्राप्त गरेको उक्त फिल्मले तीन अस्कर अवार्ड जित्दै आधुनिक प्रविधि उद्योगलाई केन्द्रमा राखेर बनेका उत्कृष्ट फिल्ममध्ये आफ्नो स्थान सुरक्षित गरेको थियो।
नयाँ फिल्ममा पनि शक्तिशाली अभिनय, तीक्ष्ण संवाद र खोजमूलक कथावस्तुको संयोजन रहने अपेक्षा गरिएको छ। ट्रेलर सार्वजनिक भएसँगै सामाजिक सञ्जाल, प्रविधि उद्योग र समकालीन राजनीतिमा रुचि राख्ने दर्शकमाझ फिल्मप्रति उत्साह बढेको छ।
‘द सोशल रेकनिङ’ आगामी अक्टोबर ९ देखि विश्वभरका सिनेमाघरमा प्रदर्शन हुने तय भएको छ। फिल्मले फेसबुकको विकासको कथा भन्दा पनि त्यसको प्रभाव र परिणामको कथा भन्न खोजेकाले यसलाई ‘द सोशल नेटवर्क’ को स्वाभाविक र अझ परिपक्व उत्तरकथाका रूपमा हेरिएको छ।
क्याटेगोरी : समाचार
प्रतिक्रिया