काठमाडौँ । अतिरिक्त समयमा ग्याब्रिएल मार्टिनेलीले गरेको निर्णायक गोलको मद्दतमा ब्राजिलले जापानलाई २–१ ले पराजित गर्दै फिफा विश्वकपको अन्तिम १६ मा स्थान सुरक्षित गरेको छ।
अमेरिकामा जारी प्रतियोगिताअन्तर्गत सोमबार राति सम्पन्न रोमाञ्चक खेलमा निर्धारित ९० मिनेट १–१ को बराबरीमा टुंगिएपछि खेल अतिरिक्त समयमा पुगेको थियो। त्यही अतिरिक्त समयको इन्जुरी समयमा मार्टिनेलीले गोल गर्दै पाँच पटकको विश्वविजेता ब्राजिललाई जित दिलाए।
खेलको सुरुआतदेखि नै अनुशासित र संगठित प्रदर्शन गरेको जापानले २९औँ मिनेटमा काइसु सानोको आकर्षक गोलमार्फत अग्रता बनाएको थियो। मिडफिल्डमा बल नियन्त्रणमा लिएपछि उनले डिबक्स बाहिरबाट गरेको शक्तिशाली प्रहारले सिधै जाली चुमेको थियो।
पहिलो हाफमा पछि परेको ब्राजिल दोस्रो हाफमा आक्रामक रूपमा प्रस्तुत भयो। ५२औँ मिनेटमा ब्रुनो गुइमारेसको हेडरलाई जापानी गोलकिपर जायन सुजुकीले रोके पनि चार मिनेटपछि ब्राजिलले बराबरी गोल फर्कायो। ग्याब्रिएल मागाल्हेसको पासमा अनुभवी मिडफिल्डर क्यासेमिरोले हेडमार्फत गोल गर्दै खेललाई १–१ को स्थितिमा पुर्याएका थिए।
बराबरीपछि ब्राजिलले लगातार दबाब सिर्जना गरिरह्यो। भिनिसियस जुनियरले अग्रता दिलाउने अवसर पाए पनि सुजुकीले उत्कृष्ट बचाउ गर्दै जापानलाई खेलमा कायम राखे।तर, अतिरिक्त समयको अन्तिम क्षणमा ब्राजिलले निर्णायक प्रहार गर्यो। दोस्रो हाफमा वैकल्पिक खेलाडीका रूपमा मैदान प्रवेश गरेका ग्याब्रिएल मार्टिनेलीले इन्जुरी समयको छैटौँ मिनेटमा गोल गर्दै ब्राजिलको क्वार्टरफाइनल यात्रालाई सुनिश्चित गरे।
यससँगै जापानको नकआउट चरणमा ऐतिहासिक सफलता हासिल गर्ने सपना फेरि अधुरै बनेको छ। लगातार १० खेलसम्म अपराजित रहेको जापानको यात्रा पनि यही खेलसँगै टुंगिएको छ।
समूह चरणमा ब्राजिलले मोरक्कोसँग बराबरी खेल्दै हाइटी र स्कटल्यान्डलाई पराजित गरेर अन्तिम ३२ मा स्थान बनाएको थियो। जापान भने समूह ‘एफ’ को उपविजेता बन्दै नकआउट चरणमा पुगेको थियो। अब ब्राजिलले क्वार्टरफाइनल प्रवेशका लागि आइभोरी कोस्ट वा नर्वेमध्ये एक टोलीसँग प्रतिस्पर्धा गर्नेछ।
ब्राजिलका लागि यो जित भावनात्मक रूपमा समेत विशेष बनेको छ। सन् १९५८ को जुन २९ मै महान् खेलाडी पेलेले दुई गोल गर्दै स्वीडेनविरुद्ध ब्राजिललाई पहिलो विश्वकप उपाधि दिलाएका थिए। त्यही ऐतिहासिक दिनको सम्झनामा प्राप्त यो जितलाई ब्राजिलियन समर्थकहरूले विशेष रूपमा लिएका छन्।जापानविरुद्धको समग्र भेटमा पनि ब्राजिलको पकड कायम रहेको छ। दुई टोलीबीच भएका १५ खेलमध्ये ब्राजिलले १२ खेल आफ्नो पक्षमा पारिसकेको छ।
फुटबलसँगै सामाजिक र सांस्कृतिक रूपमा पनि ब्राजिल र जापानबीच गहिरो सम्बन्ध रहिआएको छ। जापान बाहिर सबैभन्दा ठूलो जापानी मूलको समुदाय ब्राजिलमै बसोबास गर्दै आएको छ। जापानी फुटबलको विकासमा ब्राजिलियन लिजेन्ड जिकोको योगदानलाई पनि विशेष रूपमा स्मरण गरिन्छ। उनले सन् १९९१ मा कासिमा एन्ट्लर्सबाट खेल्दै जापानी फुटबललाई अन्तर्राष्ट्रिय स्तरमा स्थापित गर्न महत्वपूर्ण भूमिका खेलेका थिए।
क्याटेगोरी : खेलकुद
प्रतिक्रिया