काठमाडौं। स्वादमा तितो भए पनि करेला पोषक तत्वले भरिपूर्ण तरकारीका रूपमा परिचित छ। यसमा प्रशस्त फाइबर, भिटामिन र एन्टिअक्सिडेन्ट पाइने भएकाले धेरैले यसलाई तरकारी वा जुसका रूपमा सेवन गर्ने गर्छन्। केहीले छाला र कपालको हेरचाहका लागि पनि करेलाको प्रयोग गर्ने गरेका छन्।
यद्यपि, करेलासँग केही खानेकुरा एकैसाथ वा तुरुन्तै सेवन गर्दा स्वास्थ्यमा प्रतिकूल असर पर्न सक्ने भएकाले सावधानी अपनाउन विज्ञहरूले सुझाव दिएका छन्। विशेषगरी निम्न खानेकुरासँग करेलाको संयोजन उपयुक्त मानिँदैन।
दूध तथा दुग्धजन्य पदार्थ
करेला खाएलगत्तै दूध वा दुग्धजन्य पदार्थ सेवन गर्दा केही व्यक्तिमा पेट दुख्ने, अपच हुने वा पखालाजस्ता समस्या देखिन सक्ने बताइन्छ। त्यसैले यी दुईबीच केही समयको अन्तर राख्नु उपयुक्त हुन्छ।
मिठाई र चिनीजन्य परिकार
करेलाले रगतमा चिनीको मात्रा घटाउन सहयोग गर्न सक्छ। त्यसपछि धेरै मात्रामा मिठाई वा चिनीजन्य परिकार सेवन गर्दा रगतमा चिनीको स्तरमा एक्कासि उतारचढाव आउन सक्ने सम्भावना रहने भएकाले संयम अपनाउन सल्लाह दिइन्छ।
मदिरा
करेलासँग मदिरा सेवन गर्नु स्वास्थ्यका लागि उचित मानिँदैन। विशेषगरी मधुमेह भएका र औषधि वा इन्सुलिन प्रयोग गरिरहेका व्यक्तिले यस्तो संयोजनबाट बच्नुपर्ने चिकित्सकीय सुझाव छ।
भुटेको र धेरै मसलेदार खाना
करेला हल्का र फाइबरयुक्त आहार भएकाले यससँग अत्यधिक भुटेको, चिल्लो वा मसलेदार खाना सेवन गर्दा अपच, पेट फुल्ने वा भारी महसुस हुने समस्या हुन सक्छ।
मधुमेहका बिरामीले अपनाउनुपर्ने सावधानी
करेलाले रगतमा चिनीको मात्रा कम गर्न सहयोग पुर्याउन सक्छ। त्यसैले मधुमेह नियन्त्रणका लागि औषधि वा इन्सुलिन प्रयोग गरिरहेका व्यक्तिले धेरै मात्रामा करेला सेवन गर्दा रगतमा चिनी आवश्यकता भन्दा बढी घट्न सक्ने जोखिम रहन्छ। यस्तो अवस्थामा चिकित्सक वा पोषणविद्को सल्लाहअनुसार मात्र करेलाको मात्रा निर्धारण गर्नु उपयुक्त हुन्छ।
क्याटेगोरी : स्वास्थ्य/जीवन शैली
प्रतिक्रिया