नेकपा एमालेका महासचिव शंकर पोखरेलले प्रधानमन्त्री बालेन्द्र शाह (बालेन) लाई विस्थापित सुकुमवासीका लागि ‘ज्ञ’ क्रान्तिको स्पष्ट खाका ल्याउन आग्रह गरेका छन् ।
शुक्रबार बुद्ध जयन्तीका अवसरमा प्रम शाहले ‘साँचो क्रान्ति ‘क’ बाट होइन ‘ज्ञ’ बाट सुरु हुन्छ’ भन्ने आशयको सामाजिक सञ्जाल स्टाटस सार्वजनिक गरेका थिए । तर, त्यही समयमा प्रमकाे निर्देशनमा सुकुमवासी बस्तीहरूमा डोजर चलाइएको घटनाले विवाद चर्किएको छ ।
यसै सन्दर्भमा महासचिव पोखरेलले सामाजिक सञ्जालमार्फत कटाक्ष गर्दै सरकारको कदममाथि प्रश्न उठाएका हुन् । उनले विस्थापित नागरिकहरूको अवस्थाप्रति गम्भीर ध्यान दिन आग्रह गर्दै स्पष्ट योजना र समयमै पुनःस्थापनाको आवश्यकता औंल्याएका छन् ।
पोखरेलले आफ्नो स्टाटसमा लेखेका छन्, “वास्तविक क्रान्ति ‘ज्ञ’ (ज्ञान) बाट सुरु हुन्छ भन्ने प्रधानमन्त्रीले आजको संकटमा कस्तो क्रान्तिकारी कदम चाल्दै हुनुहुन्छ ? प्रभावित तथा असुरक्षित महसुस गरिरहेका सुकुमवासी नागरिकलाई स्पष्ट योजनाका साथ समयमै आश्वस्त पार्नुपर्ने हैन र ?”
उनले २०७५ सालमा बारा–पर्सामा आएको भीषण आँधीपछि सरकारले छिटो पुनःस्थापना गरेको उदाहरण स्मरण गर्दै अहिलेको अवस्थासँग तुलना गरेका छन् । त्यसबेला छोटो समयमै आवास निर्माण गरी प्रभावितलाई पुनःस्थापित गरिएको उल्लेख गर्दै उनले अहिले भने सरकारकै कदमले हजारौँ नागरिक घरवारविहीन बनेको टिप्पणी गरेका छन् ।
पोखरेलले बर्षा हुनुअघि नै पुनःस्थापना नभए गम्भीर मानवीय संकट निम्तिने चेतावनी दिएका छन् । अस्थायी बसोबासको दयनीय अवस्था र त्यहाँका वास्तविकता सार्वजनिक हुन नदिइएको आरोपसमेत उनले लगाएका छन् ।
अन्त्यमा उनले सरकारलाई मानवता, मानवीय जिम्मेवारी र दीगो समाधानतर्फ गम्भीर बन्न आग्रह गरेका छन् ।
क्याटेगोरी : राजनीति
प्रतिक्रिया