काठमाडौं । बजारमा मागको तुलनामा आपूर्ति कम भएपछि केराको मूल्यमा अस्वाभाविक वृद्धि भएको छ। सरकारले भारतीय केरा आयातमा रोक लगाएपछि त्यसको असर बजार मूल्यमा परेको हो।
खुद्रा बजारमा एक दर्जन केराको भाउ ३५० रुपैयाँसम्म पुगेको उपभोक्ताले बताइरहेका छन्। केरा कम आउन थालेपछि थोकमा केरा बेच्ने कुलेश्वर फलफूल बजारका कतिपय थोक पसल बन्द नै भएका छन्।
व्यापारीहरुले केरा आयात नभएकाले बिक्री बन्द गरेका छन् । केरा बिक्री हुने सटरहरु पनि बन्द भएका छन् । कतै सटर बन्द गरिएका छन् भने कतै केराको मूल्य तोकिएको छैन र उपभोक्ताले चाहेअनुसार केरा उपलब्ध हुनसकेको छैन ।
नेपालमा वार्षिक करिब ४ लाख ४० हजार मेट्रिक टन केरा खपत हुन्छ । नेपालमै उत्पादन भएको केराको बजारिकरणपछि थप १२ देखि १४ प्रतिशत मात्रै आयात गर्नुपर्ने अवस्था छ।
तर काठमाडौँका बजारमा ५० प्रतिशत केरा भारतबाटै आयात भइरहँदा नेपाली उत्पादनले बजार नपाउने र बिचौलियाका कारण केराको मूल्य उच्च भएपछि विरोध भएको हो ।
अवैध आयात नियन्त्रण गर्न प्रशासनले कडाइ थालेपछि केराको बजार बन्दजस्तै भएको छ ।
क्याटेगोरी : समाचार
प्रतिक्रिया