काठमाडौँ । राष्ट्रिय स्वतन्त्र पार्टी (रास्वपा) कर्णाली प्रदेश समितिको नयाँ नेतृत्व चयनका लागि भएको मतदान विवादका बीच सम्पन्न भएको छ। निर्वाचन प्रक्रिया रोक्न माग गर्दै उजुरी परे पनि मतदान कार्य निर्धारित प्रक्रियाअनुसार अगाडि बढाइएको जनाइएको छ।
रास्वपा कर्णाली प्रदेशका महामन्त्री ललित कुमार चन्दका अनुसार मतदान सम्पन्न भइसकेको छ भने मतगणनाको प्रक्रिया पनि सुरु गरिएको छ। उनले पहिलो चरणको मतगणना सम्पन्न भएपछि आवश्यक परे दोस्रो चरणको मतदानसमेत गरिने जानकारी दिए।प्रदेश नेतृत्व चयनका लागि सभापति पदका उम्मेदवार नन्दकिशोर बस्नेत (एनके) ले निर्वाचन प्रक्रिया स्थगन गर्न माग गर्दै पार्टीको केन्द्रीय कार्यालय र केन्द्रीय निर्वाचन आयोगमा उजुरी दिएका थिए। यद्यपि, उजुरीका बाबजुद निर्वाचन प्रक्रिया अघि बढाइएको हो।
जेठ ३१ गतेदेखि सुरु भएको प्रदेश अधिवेशन नेतृत्व चयनको विषयमा देखिएको विवादका कारण लम्बिएको थियो। विवाद समाधानको प्रयाससँगै निर्वाचन प्रक्रिया पुनः अघि बढाइएको पार्टी स्रोतले जनाएको छ।महामन्त्री चन्दका अनुसार उजुरी दर्ता गराएका बस्नेतले आफ्नो उम्मेदवारी भने फिर्ता नलिई कायम राखेका छन्। यसले नेतृत्व चयनको प्रतिस्पर्धा अझ रोचक बनेको छ।
उता, रास्वपाको केन्द्रीय निर्वाचन आयोगका प्रमुख भुवन केसीले उजुरी परेको विषयमा आफूलाई औपचारिक जानकारी नभएको बताएका छन्। उनले निर्वाचनका क्रममा सामान्य विवाद र असहमति देखिन सक्ने उल्लेख गर्दै उजुरीबारे थप जानकारी आफूसँग नभएको प्रतिक्रिया दिए।
यद्यपि, पार्टीका सहमहामन्त्री विपिन कुमार आचार्यले बस्नेतबाट उजुरी प्राप्त भएको पुष्टि गरेका छन्। उजुरीमाथि पार्टीले के निर्णय गर्छ भन्ने विषय भने अझै स्पष्ट भइसकेको छैन।कर्णाली प्रदेशको नेतृत्व चयनलाई लिएर देखिएको विवादका बीच सम्पन्न भएको मतदानको नतिजाले प्रदेश संगठनको आगामी दिशा निर्धारण गर्ने अपेक्षा गरिएको छ।
क्याटेगोरी : राजनीति
प्रतिक्रिया