विद्युत प्राधिकरणको अवकाश कोषले विभिन्न बैंक तथा वित्तीय संस्थाको ३४ वटा डिबेन्चर बिक्री गर्ने
काठमाडौं । नेपाल विद्युत प्राधिकरणको अवकाश कोष व्यवस्थापन महाशाखाले आफ्नो लगानी पोर्टफोलियोमा रहेका विभिन्न ३४ वटा बैंक तथा वित्तीय संस्थाका डिबेन्चर (ऋणपत्र) हरू खुला बजारमा बिक्री गर्ने भएको छ।
प्राधिकरणले एक सूचना प्रकाशित गर्दै आफ्नो स्वामित्वमा रहेका डिबेन्चरहरू खुला बजारमा प्रतिस्पर्धात्मक दरमा बिक्री गर्न लागेको जानकारी दिएको हो।
असार १६ गतेदेखि बिक्री खुला
पहिलो पटक असार १२ गते प्रकाशित सूचना अनुसार, यी डिबेन्चरहरूको खरिद-बिक्री प्रक्रिया असार १६ गतेदेखि खुला गरिएको छ। इच्छुक लगानीकर्ताहरूले नेपाल धितोपत्र बोर्डबाट अनुमति प्राप्त शेयर तथा डिबेन्चर खरिद-बिक्री गर्न इजाजतप्राप्त संस्थाहरू (धितोपत्र दलाल व्यवसायी/ब्रोकर कम्पनीहरू) मार्फत प्रतिस्पर्धात्मक दरमा खरिद गर्न सक्नेछन्।
कुन डिबेन्चर कति कित्ता बिक्रीमा ?
प्राधिकरणले बिक्रीमा राखेका सबै डिबेन्चरहरू ‘फ्री ब्यालेन्स’ अर्थात् कुनै पनि बन्धक, लक–इन वा रोक्का नरहेका पूर्ण रूपमा सहजै हस्तान्तरण योग्य अवस्थामा छन्।
बिक्रीमा राखिएका प्रमुख डिबेन्चरहरू र तिनको संख्या यसप्रकार छ:
कुमारी बैंक डिबेन्चर (KBLD89): ४,६४,६२३ कित्ता
ग्लोबल आइएमई बैंक डिबेन्चर (GBILD84/85): २,९९,१३७ कित्ता
सिद्धार्थ बैंक डिबेन्चर (SBLD89): २,९१,७८७ कित्ता
एभरेष्ट बैंक डिबेन्चर (EBLD85): २,५५,०३३ कित्ता
कुमारी बैंक डिबेन्चर (KBLD90): १,५०,००० कित्ता
बैंक अफ काठमाण्डू डिबेन्चर (BOKD86KA): १,४५,७७९ कित्ता
नागरिक लगानी कोष डिबेन्चर (CIZBD90): १,१०,००० कित्ता
सनराइज बैंक डिबेन्चर (SRBLD83): १,००,००० कित्ता
नबिल बैंक डिबेन्चर (NABILD2089): ३३,८६२ कित्ता
नेपाल इन्भेष्टमेन्ट मेगा बैंक डिबेन्चर (NIMBD2085): ८०,००० कित्ता
यसबाहेक कृषि विकास बैंक, एचआईडीसीएल, सिटिजन्स बैंक, हिमालयन बैंक, नेपाल बैंक, एनआईसी एशिया बैंक, प्रभु बैंक, राष्ट्रिय वाणिज्य बैंक, सानिमा बैंक, नेपाल एसबिआई बैंक र स्ट्यान्डर्ड चार्टर्ड बैंक लगायतका संस्थाका डिबेन्चरहरू पनि बिक्रीको सूचीमा समावेश छन्।
प्राधिकरणको अवकाश कोषले आफ्नो लगानी विविधीकरण तथा वित्तीय व्यवस्थापन गर्ने नियमित प्रक्रिया अन्तर्गत यी ऋणपत्रहरू दोस्रो बजारमा बिक्री गर्न लागेको बुझिएको छ।
क्याटेगोरी : अर्थ
प्रतिक्रिया