काठमाडौं । नेपाल राष्ट्र बैंकले आर्थिक वर्ष २०८२/८३ को मौद्रिक नीतिको वार्षिक समीक्षा प्रतिवेदन सार्वजनिक गर्दै आर्थिक तथा मौद्रिक लक्ष्यहरूको कार्यान्वयन स्थिति सार्वजनिक गरेको छ। प्रतिवेदन अनुसार चालु आर्थिक वर्षका अधिकांश सूचकहरू लक्ष्यको परिधिभित्रै देखिएका छन्।
सरकारले आर्थिक वर्ष २०८२/८३ का लागि उपभोक्ता मुद्रास्फीति ५.० प्रतिशतको सीमाभित्र कायम राख्ने लक्ष्य लिएकोमा चालु आर्थिक वर्षको दश महिनासम्मको औसत उपभोक्ता मुद्रास्फीति २.६६ प्रतिशत मात्रै रहेको छ। यद्यपि, २०८३ बैशाख महिनामा वार्षिक विन्दुगत मुद्रास्फीति भने ५.०४ प्रतिशत पुगेको छ।
यसैगरी मौद्रिक नीतिले विस्तृत मुद्रा प्रदायको वृद्धिदर १३.० प्रतिशत र निजी क्षेत्रतर्फ जाने कर्जाको वृद्धिदर १२.० प्रतिशतसम्म रहने प्रक्षेपण गरेको थियो। तर २०८३ बैशाखको तथ्याङ्क अनुसार विन्दुगत आधारमा विस्तृत मुद्रा प्रदायको वृद्धिदर लक्ष्यभन्दा बढी अर्थात् १५.२ प्रतिशत पुगेको छ भने निजी क्षेत्रतर्फ जाने कर्जाको वृद्धिदर भने लक्ष्यभन्दा निकै कम अर्थात् ६.५ प्रतिशतमा सीमित भएको छ।
अर्कोतर्फ बाह्य क्षेत्रको स्थिति भने निकै मजबुत देखिएको छ। आर्थिक वर्ष २०८२/८३ को मौद्रिक नीतिले कम्तीमा सात महिनाको वस्तु तथा सेवा आयात धान्न पर्याप्त हुने गरी विदेशी विनिमय सञ्चिति कायम राख्ने लक्ष्य लिएको थियो। राष्ट्र बैंकको समीक्षा अनुसार २०८३ बैशाख मसान्तमा कायम रहेको विदेशी विनिमय सञ्चितिले १९.२ महिनाको वस्तु तथा सेवा आयात धान्न पर्याप्त हुने देखिएको छ, जुन लक्ष्यको तुलनामा निकै धेरै हो।
क्याटेगोरी : अर्थ
प्रतिक्रिया