वैदेशिक रोजगारीको पसिनाले अर्थतन्त्रमा नयाँ उचाइ : १० महिनामै १९ खर्बभन्दा बढी रेमिट्यान्स भित्रियो
काठमाडौं । वैदेशिक रोजगारीमा रहेका नेपालीहरूले पठाएको रेमिट्यान्सले नेपालको अर्थतन्त्रलाई थप मजबुत बनाएको छ। चालु आर्थिक वर्ष २०८२/८३ को पहिलो १० महिनामै रेमिट्यान्स आप्रवाह ४१.२ प्रतिशतले वृद्धि भई ऐतिहासिक १९ खर्ब १६ अर्ब ९० करोड रुपैयाँ पुगेको छ।
नेपाल राष्ट्र बैंकले सार्वजनिक गरेको तथ्यांकअनुसार वैशाख महिनामा मात्रै २ खर्ब ५७ अर्ब ४९ करोड रुपैयाँ रेमिट्यान्स नेपाल भित्रिएको छ। अघिल्लो वर्षको सोही अवधिको तुलनामा भएको यो उल्लेखनीय वृद्धिले विदेशी मुद्रा सञ्चिति, चालु खाता तथा शोधनान्तर स्थिति थप सुदृढ भएको राष्ट्र बैंकले जनाएको छ।
देशभित्र उद्योग, व्यापार, निर्माण तथा अन्य आर्थिक गतिविधिहरू अपेक्षाकृत सुस्त भइरहेका बेला विदेशमा श्रम गरिरहेका लाखौँ नेपालीले पठाएको रकम नै अहिले अर्थतन्त्रको मुख्य आधार बनेको देखिएको छ। रेमिट्यान्स वृद्धिसँगै बैंकिङ प्रणालीमा तरलता बढ्नुका साथै विदेशी मुद्रा सञ्चितिमा पनि सकारात्मक प्रभाव परेको अर्थविद्हरूको भनाइ छ।
विश्लेषकहरूका अनुसार रेमिट्यान्सले तत्कालीन रूपमा अर्थतन्त्रलाई राहत दिए पनि दीर्घकालीन आर्थिक समृद्धिका लागि उत्पादन, रोजगारी सिर्जना र औद्योगिक विकासमा लगानी बढाउन आवश्यक छ। अन्यथा देशको अर्थतन्त्र अत्यधिक रूपमा वैदेशिक रोजगारी र रेमिट्यान्समा निर्भर हुने जोखिम कायम रहने उनीहरूको चेतावनी छ।
यद्यपि वर्तमान अवस्थामा भने विदेशमा पसिना बगाइरहेका नेपाली श्रमिकहरूको योगदानले नेपालको अर्थतन्त्रलाई संकटबाट जोगाउँदै स्थायित्व प्रदान गरेको स्पष्ट देखिएको छ। उनीहरूले पठाएको रकमले लाखौँ परिवारको जीविकोपार्जन मात्र नभई राष्ट्रिय अर्थतन्त्रलाई समेत चलायमान राख्न महत्वपूर्ण भूमिका निर्वाह गरिरहेको छ।
क्याटेगोरी : अर्थ
प्रतिक्रिया