काठमाडौं । ५९ वर्षअघि विनाशकारी भूकम्पको पीडा भोगेको भेनेजुएला पुनः शक्तिशाली भूकम्पबाट प्रभावित भएको छ। सन् १९६७ मा राजधानी काराकास केन्द्रविन्दु भएर गएको भूकम्पमा दुई सयभन्दा बढी मानिसले ज्यान गुमाएका थिए। त्यसको झण्डै छ दशकपछि देशले फेरि ठूलो प्राकृतिक विपत्तिको सामना गर्नुपरेको छ।
भेनेजुएलामा ७.२ र ७.५ म्याग्निच्युडका लगातार दुई शक्तिशाली भूकम्प गएपछि ठूलो जनधनको क्षति भएको प्रारम्भिक विवरणमा उल्लेख गरिएको छ। अमेरिकी भूगर्भ सर्वेक्षणका अनुसार भूकम्पको केन्द्रविन्दु राजधानी काराकासबाट करिब १६० किलोमिटर पश्चिम क्षेत्रमा रहेको थियो।
अहिलेसम्म कम्तीमा १६४ जनाको मृत्यु भएको पुष्टि भएको छ भने ७ सयभन्दा बढी घाइते भएका छन्। भूकम्पका कारण धेरै भवन तथा संरचना भत्किएका छन्। प्रभावित क्षेत्रमा उद्धार तथा राहत कार्य तीव्र रूपमा जारी रहेकाले मृतक र घाइतेको संख्या अझ बढ्न सक्ने अनुमान गरिएको छ।
सरकारी निकाय तथा उद्धार टोलीहरू प्रभावित क्षेत्रमा परिचालन गरिएका छन् भने हजारौं नागरिक सुरक्षित स्थानतर्फ सरेका छन्। भूकम्पपछि परकम्पनसमेत महसुस भइरहेका कारण स्थानीयवासी त्रसित बनेका छन्।
क्याटेगोरी : अन्तराष्ट्रिय
प्रतिक्रिया