विष्णु पौडेलसँगै बालेन र सुधन गुरुङको पनि सम्पत्ति छानबिन हुनुपर्छ : महेश बस्नेत
काठमाडौं । नेकपा (एमाले)का नेता महेश बस्नेतले प्रधानमन्त्री बालेन शाह र गृहमन्त्री सुधन गुरुङ्ग लगायतको सम्पत्तिमाथि पनि छानबिन हुनुपर्ने माग गरेका छन्।
सामाजिक सञ्जालमा लेख्दै उनले ३५ वर्षभन्दा बढी सार्वजनिक जीवनमा रहेका पूर्वअर्थमन्त्री विष्णु पौडेलको सम्पत्तिमाथि छानबिन हुन सक्ने हो भने ३५–३६ वर्षको उमेरमै उल्लेख्य सम्पत्ति आर्जन गरेको भन्दै प्रधानमन्त्री बालेन्द्र शाह(बालेन) तथा गृहमन्त्री सुधन गुरुङ लगायतका व्यक्तिहरूको सम्पत्तिबारे पनि समान रूपमा छानबिन हुनुपर्ने बताएका हुन्।
बस्नेतले छानबिनको मापदण्ड व्यक्ति, पार्टी वा राजनीतिक निकटताका आधारमा फरक हुन नहुनेमा जोड दिएका छन्। उनका अनुसार जनताले कसैलाई दोषी वा निर्दोष ठहर गर्न होइन, बरु सम्पत्ति आर्जनको स्रोतसहित तथ्य सार्वजनिक गर्न माग गरिरहेको उल्लेख छ।
उनले पूर्व न्यायाधीश राजेन्द्रप्रसाद भण्डारीको अध्यक्षतामा गठन गरिएको सम्पत्ति छानबिन आयोगको प्रतिवेदनबारे पनि टिप्पणी गर्दै, केही विषयहरू सार्वजनिक नगरिएको र प्रक्रिया अपारदर्शी देखिएको दाबी गरेका छन्। साथै, निष्पक्ष छानबिन र पूर्ण पारदर्शिताबाट मात्रै जनविश्वास कायम रहने बताएका छन्।
क्याटेगोरी : राजनीति
प्रतिक्रिया