रास्वपा महाधिवेशनमा बालेनको उम्मेदवारी नपरेपछि चर्चा, वरिष्ठ नेतामा मनोनयनको तयारी?
चितवन । राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत नयाँ नेतृत्व चयनका लागि निर्वाचन प्रक्रिया जारी रहेका बेला उम्मेदवारहरूको सूचीमा बालेन शाहको नाम नदेखिएपछि प्रतिनिधि र कार्यकर्ताबीच विभिन्न चर्चा सुरु भएको छ।
महाधिवेशनमा सभापति पदमा रवि लामिछाने सर्वसम्मत चयन भइसकेका छन् भने ९९ सदस्यीय केन्द्रीय समितिका लागि ३५५ जनाको उम्मेदवारी परेको छ। तर चर्चित सार्वजनिक व्यक्तित्वका रूपमा हेरिएका बालेनले कुनै पनि पदमा उम्मेदवारी दर्ता नगरेको देखिएको छ।
पार्टीभित्रको सहमतिअनुसार बालेनलाई केन्द्रीय समितिमा वरिष्ठ नेताको जिम्मेवारी दिने तयारी रहेको चर्चा महाधिवेशनस्थलमा भइरहेको छ। स्रोतहरूका अनुसार सभापति रवि लामिछानेले उनलाई वरिष्ठ नेतामा मनोनीत गर्ने सम्भावना रहेको बताइए पनि यसबारे पार्टीले औपचारिक निर्णय सार्वजनिक गरेको छैन।
यद्यपि, पार्टी विधानअनुसार वरिष्ठ नेता पदका लागि केन्द्रीय समितिसँग सम्बन्धित प्रक्रिया पूरा गर्नुपर्ने भएकाले बालेनको भूमिकाबारे थप स्पष्टता आउन बाँकी रहेको सहभागीहरू बताउँछन्।
महाधिवेशनमा नेतृत्व चयनसँगै पार्टीको भावी संगठनात्मक संरचना, शक्ति सन्तुलन र राजनीतिक दिशाबारे समेत व्यापक बहस भइरहेको छ। बालेनको सम्भावित भूमिकाले पनि प्रतिनिधिहरूको चासो तानेको देखिन्छ।
रास्वपाले भने हालसम्म बालेन शाहको जिम्मेवारीबारे कुनै आधिकारिक घोषणा गरेको छैन। आगामी दिनमा पार्टी नेतृत्वबाट हुने निर्णयले यस विषयमा स्पष्टता आउने अपेक्षा गरिएको छ।
क्याटेगोरी : राजनीति
प्रतिक्रिया