काठमाडौं । माइतीघर मण्डलामा आन्दोलनमा रहेकी शोभा पाठक र एमाले सचिव महेश बस्नेतकी पत्नी अम्बिका बस्नेतबीच झडप भएको छ । सोमबार मध्याह्न उनीहरूबीच झडप भएपछि प्रहरीले अम्बिकासहित केही महिलालाई नियन्त्रणमा लिएको छ।
सुधन गुरुङको पुनर्वहालीको माग गर्दै पाठक, रस्मिला धामीलगायत महिलाहरू माइतीघरमा धर्नामा बसेका थिए । सोही क्रममा अम्बिका आफ्ना समर्थकसहित त्यहाँ पुगेपछि विवाद चर्किँदा झडप भएको थियो । त्यसपछि दुवै पक्षबीच हातहालाहालको अवस्था सिर्जना भएको थियो ।
प्रहरीले हस्तक्षेप गरी उनीहरूलाई छुट्याएको थियो र अम्बिकासहित केही महिलालाई नियन्त्रणमा लिएर लगेको छ ।
केही दिनअघि शोभा पाठकले महेश बस्नेतमाथि कारबाहीको माग गर्दै अनशन बसेकी थिइन् । त्यतिबेला तत्कालीन गृहमन्त्री सुधन गुरुङ उनलाई भेट्न पुगेका थिए । गुरुङले राजीनामा दिएपछि शोभाले अनशन तोडेकी थिइन् र अहिले उनको पुनर्वहालीको माग गर्दै आन्दोलन गरिरहेकी छन् ।
क्याटेगोरी : समाचार
प्रतिक्रिया