रास्वपा महाधिवेशनको बन्दसत्र स्थलमा अन्योल, चितवन उद्योग संघले माग्यो सरकारको स्पष्ट निर्णय
चितवन, असार १७ — राष्ट्रिय स्वतन्त्र पार्टी (रास्वपा) को आसन्न महाधिवेशनको बन्दसत्रका लागि हल व्यवस्थापनमा नयाँ विवाद देखिएको छ। चितवन उद्योग संघले सरकारको स्पष्ट र आधिकारिक निर्णयबिनै प्रदर्शनी हल उपलब्ध गराउन नसकिने अडान लिएपछि महाधिवेशनको तयारी थप चर्चाको विषय बनेको छ।
रास्वपाले आगामी असार ७ देखि ९ गतेसम्म चितवनमा आयोजना हुने महाधिवेशनको बन्दसत्रका लागि घरेलु तथा साना उद्योग कार्यालय परिसरस्थित प्रदर्शनी हल प्रयोग गर्न अनुमति मागेको थियो। सोही अनुरोधलाई मध्यनजर गर्दै उद्योग मन्त्रालयले समेत एकपटकका लागि हल प्रयोग गर्न दिन अनुरोधसहित पत्राचार गरेको बताइएको छ।
तर चितवन उद्योग संघले मन्त्रिपरिषद्को पूर्वनिर्णयअनुसार उक्त हल औद्योगिक प्रदर्शनी तथा विपद् व्यवस्थापनबाहेक अन्य प्रयोजनमा प्रयोग गर्न नमिल्ने व्यवस्था रहेको जनाएको छ। संघले सरकारको स्पष्ट निर्णय वा विशेष निर्देशन प्राप्त नभएसम्म हल उपलब्ध गराउन नसकिने जनाएको हो।
चितवन उद्योग संघका अध्यक्ष मदन घिमिरेका अनुसार हालसम्म रास्वपालाई हल प्रयोगका लागि अन्तिम स्वीकृति प्रदान गरिएको छैन। उनले विगतमा अन्य राजनीतिक दलहरूले पनि विभिन्न कार्यक्रमका लागि हल माग गरे तापनि संघले अनुमति नदिएको स्मरण गराए।
यता रास्वपाले भने सुरक्षा संवेदनशीलता तथा व्यवस्थापनका कारण बन्दसत्रका लागि एकपटक विशेष अनुमति दिन आग्रह गरेको जनाएको छ।
सरकारले यस विषयमा कस्तो निर्णय लिन्छ भन्ने प्रतीक्षासँगै रास्वपाको महाधिवेशन तयारी र बन्दसत्रको स्थल व्यवस्थापन अहिले चासोको केन्द्रमा परेको छ।
क्याटेगोरी : समाचार
प्रतिक्रिया