विश्वकप विजेता स्पेनिस फुटबलर फ्याबियन रुइज र गाभीलाई आफ्नै तौल बराबरको गोलभेडा उपहार
काठमाडौं । विश्वकप फुटबलको उपाधि जित्नु कुनै पनि खेलाडीका लागि जीवनकै ठूलो उपलब्धि र सम्मानको विषय हो। तर, उपाधि जितेर गृहजिल्ला फर्किँदा आफ्नै शारीरिक तौल बराबर गोलभेडा उपहार पाउनु भने निकै अनौठो र रोचक मानिन्छ।उत्तर अमेरिकामा आयोजित विश्वकपको उपाधि चुमेर फर्किएका स्पेनिस राष्ट्रिय टोलीका मिडफिल्डरद्वय फ्याबियन रुइज र गाभीलाई उनीहरूको गृहनगरमा यसरी नै अनौठो शैलीमा सम्मान गरिएको छ।
पेरिस सेन्ट-जर्मेनका मिडफिल्डर रुइज र बार्सिलोनाका युवा स्टार गाभी स्पेनको सेभिल शहर नजिकै रहेको करिब ४० हजार जनसङ्ख्या भएको सानो शहर ‘लोस पालासियोस इ भिल्लाफ्राङ्का’का बासिन्दा हुन्। बुधबार नगरपालिका भवनमा आयोजित विशेष औपचारिक कार्यक्रममा उनीहरूलाई स्वागत गरिएको थियो।फाइनलमा अर्जेन्टिनाविरुद्ध सुरुआती ११ मा खेलेका रुइज र गाभी गलामा स्वर्णपदक लगाएर कार्यक्रमस्थल पुग्दा हजारौँ नगरवासीले उनीहरूको भव्य स्वागत गरेका थिए। सम्मान कार्यक्रमको एक भागका रूपमा दुवै खेलाडीलाई डिजिटल तराजुमा उभ्याएर तौल लिइएको थियो।
आफ्नो तौल अनुसार फ्याबियन रुइजले ८५ केजी गोलभेडा प्राप्त गरे । गाभीले ६८.५ केजी गोलभेडा प्राप्त गरे। स्थानीय निकायका अधिकारीहरूका अनुसार आफ्ना महान् खेलाडीहरूलाई सम्मान गर्न तौल बराबर गोलभेडा दिने यो परम्परा यस नगरपालिकाको एउटा छुट्टै र स्थापित पहिचान बनिसकेको छ।यसअघि सन् २०१० मा स्पेनले पहिलो पटक विश्वकप जित्दा सोही नगरका पूर्व विङ्गर जिसस नाभास लाई पनि यसरी नै तौल बराबर गोलभेडा दिएर सम्मान गरिएको थियो। नाभास र रुइजले ‘युएफा युरो २०२४’ जित्दा पनि यही परम्पराअनुसार गोलभेडा उपहार पाएका थिए।
नगरपालिकाले आफ्ना तीनै जना विश्वकप विजेता खेलाडीहरूको सम्मानमा थप घोषणासमेत गरेको छ। जसअनुसार नगरको खेलकुद परिसरको नाम पहिले नै नाभासको नाममा राखिसकिएको छ।अब रुइज र गाभीको सम्मानमा नगरका दुईवटा फुटबल मैदानहरूको पुनः नामाकरण गरिनेछ। तीनै जना च्याम्पियन खेलाडीहरूको स्थायी सम्झनामा नगरपालिकामै एउटा विशेष स्मारक निर्माण गरिनेछ।नगर काउन्सिलले जारी गरेको विज्ञप्तिमा भनिएको छ, ‘यी तीनै जना खेलाडीहरू सिङ्गो शहरका लागि गर्वका प्रतीक हुन्। उनीहरूको खेलकुद यात्रा र मानवीय व्यक्तित्वले आउँदा पुस्ता र युवाहरूलाई सधैँ प्रेरणा दिइरहनेछ।’
क्याटेगोरी : खेलकुद
प्रतिक्रिया