विश्वकै सबैभन्दा ठूलो यात्रुवाहक विमान ए–३८० का केही जहाजको पखेटाभित्र रहेको मुख्य संरचनात्मक भागमा चिरा देखिएपछि विमान निर्माता एअरबसले १६ वटा सुपरजम्बो विमानको विशेष निरीक्षण गर्ने भएको छ ।
युरोपेली सङ्घ (ईयू) को उड्डयन सुरक्षा निकायले नियमित मर्मत परीक्षणका क्रममा पखेटाको महत्त्वपूर्ण संरचनामा समस्या भेटिएपछि सम्बन्धित विमानहरूको तत्काल निरीक्षण गर्न निर्देशन दिएको एअरबसलाई उदधृत गर्दै समाचार संस्था एएफपीले जनाएको छ ।
निरीक्षणमा समावेश गरिएका १६ विमानमध्ये १५ वटा एमिरेट्स र एउटा क्वान्टास एअरलाइन्सले सञ्चालन गरिरहेका छन् । तीमध्ये ५ वटा एमिरेट्सका विमानमा तत्काल जाँच आवश्यक रहेको खबरमा उल्लेख छ ।
एमिरेट्सले आउँदो ४८ घण्टाभित्र निरीक्षण प्रक्रिया शुरू गर्ने र मर्मतपछि मात्र विमानहरू पुनः सेवामा फर्काइने जनाएको छ । कम्पनीले उडान तालिकामा न्यूनतम असर पार्ने गरी एअरबस र सम्बन्धित निकायसँग समन्वय भइरहेको पनि बताएको छ ।
ए–३८० सञ्चालन गर्ने वायुसेवामा एमिरेट्स, सिङ्गापुर एअरलाइन्स, ब्रिटिश एअरवेज, क्वान्टास, लुफ्थान्सा, कतार एअरवेज, कोरियन एअर, एतिहाद एअरवेज, एएनए र एशियाना एअरलाइन्स रहेका छन् । विश्वकै सबैभन्दा ठूलो ए–३८० फ्लीट एमिरेट्ससँग छ र यसले सञ्चालनमा रहेका आधाभन्दा धेरै सुपरजम्बो उडाउँदै आएको छ ।
सन् २०२१ मा एअरबसले ए–३८० उत्पादन बन्द गरिसकेको भए पनि यी विमानहरू अझै लामो दूरीका अन्तर्राष्ट्रिय उडानमा व्यापक रूपमा प्रयोग भइरहेका छन् ।
एअरबसका अनुसार गएको डिसेम्बरको प्राविधिक निर्देशनपछि भएको परीक्षणका क्रममा पखेटाको संरचनात्मक मजबुतीमा असर पार्न सक्ने चिराहरू फेला परेका थिए ।
ए–३८० विमानले यसअघि पनि पखेटासम्बन्धी समस्या सामना गरेको थियो । सन् २०१२ मा पखेटाको बाहिरी भाग र भित्री संरचनालाई जोड्ने भागमा चिरा देखिएपछि विश्वभरका ए–३८० विमानहरूको निरीक्षण भएको थियो । त्यसपछि एअरबसले नयाँ विमानमा डिजाइन परिवर्तन गरी समस्या समाधान गर्ने प्रयास गरेको थियो ।
क्याटेगोरी : अन्तराष्ट्रिय, अर्थ
प्रतिक्रिया